देशमा जताततै अराजकता फैलिएको छ त्यो नेपाली कांग्रेस बाहेकले सम्हाल्न सक्दैन: डा. शेखर कोइराला
वि.सं.२०८० असोज २० शनिवार १३:३७
काठमाडौं: नेपाली कांग्रेसका नेता डा. शेखर कोइरालाले पुष्पकमल दाहाल ‘प्रचण्ड’ नेतृत्व सच्चिन आवश्यक रहेको बताएका छन् । शनिबार आयोजित एक कार्यक्रमलाई बोल्दै कोइरालाले सरकार सच्चिन नसके बाटो खाली गरिदिन आग्रह गरेका हुन् ।
उनले देश अफ्ठ्यारो स्थितिबाट अघि बढिरहेकाले जताततै अराजकता रहेको उल्लेख गरे । उनले भने, ‘देशमा जताततै अराजकता रहेको छ । त्यो कांग्रेसबाहेकले सम्हाल्न सक्दैन ।’ कोइरालाले कांग्रेसको समर्थनमा बनेका प्रधानमन्त्री प्रचण्ड अराजक बनेपछि उनलाई मानिरहन नपर्ने धारणा राखे । नेपाल कुनैपनि जाति विशेष नभएको बताउँदै कोइरालाले बहुजातिय, बहुभाषिक नेपालमा जातिय राज्य दिन नसकिने धारणा राखे ।
कोइरालाले भने, ‘गोरखाबाटै जितेर प्रधानमन्त्री हुनुभएको छ । देशको प्रधानमन्त्री के भन्नुहुन्छ भने जातिय राज्य दिन्छु, दुई लाख मान्छे सडकमा उतार्छु भन्नुहुन्छ । के प्रधानमन्त्रीले खल्तिबाट जातीय राज्य निकालेर दिने हो ? देशको प्रधानमन्त्रीले त्यस्तो गैर जिम्मेवार कुरा गर्न मिल्दैन ।’ प्रधानमन्त्री प्रचण्डका गतिविधिप्रति विमत्ति राख्दै कोइरालाले पछिल्लो समय सरकारविरुद्ध निरन्तर आक्रोश व्यक्त गरिरहेका छन् । उनले कांग्रेसकै नेतृत्वमा सरकार बनाउनु पर्नेमा जोड दिँदै आएका छन् ।
वि.सं.२०८० असोज २० शनिवार १३:३७