अखबार नेपाल ट्रेन्डिङ

काठमाडौं: संस्कृत, पर्यटन तथा नागरिक उड्डयनमन्त्री सुदन किरातीले पोखरा अन्तर्राष्ट्रिय विमानस्थल बिआरआई अन्तर्गत नरहेको प्रस्ट पारेका छन् ।

नेपाली कांग्रेसका सांसद रामहरि खतिवाडाले सोधेको प्रश्नको जवाफ दिँदै उनले उक्त कुरा संसारलाई थाहा भएको बताए । उनले नेपाल र चीनबीच २०१६ मा मात्रै बिआरआई सम्झौता भएको स्पष्ट पारे ।

पोखरा अन्तर्राष्ट्रिय विमानस्थल त्यसअघि २०१२ मै निर्माणकार्य सुरु भएको उनको भनाइ छ । संसारलाई थाहा भएको कुरामा नअल्मलिन उनले सांसदहरूलाई आग्रह गरे ।

‘छ्यापछ्याप्ती छ त । फेरि संसदमा यही कुरा उठ्छ । बिआरआई सम्झौता त २०१६ मा भएको हो । पोखरा एयरपोर्ट २०१२ मा निर्माण सुरु भएको हो,’ उनले प्रतिप्रश्न गरे, ‘संसारले यो बिआरआई होइन भनिरहेको छ । सांसदहरू अल्मलिएका अल्मलियै छन् । बिआरआई हो कि, यो के हो ? ध्वनी प्रदूषण गरेका छन् । समय र शक्तिको खर्च गरेर के गर्छौं हामी ?’

उनले पत्रपत्रिकामा पनि यो बिआरआई होइन भनेर सम्प्रेषण भइरहेको र आफूहरूलाई हेरेर समय र लाज आफैं लजाएको अनुभूति भइरहेको बताए । गत बुधबार पोखरा अन्तर्राष्ट्रिय विमानस्थलमा मन्त्री किराती सहभागी भएकै कार्यक्रममा चिनियाँ राजदूत छन् सोङ यो एयरपोर्ट बीआरआई अन्तर्गत बनेको दाबी गरेका थिए ।

‘पोखरा अन्तर्राष्ट्रिय विमानस्थल २०२३ को जनवरीमा सुरुवात भएको हो। यसको डिजाइन र निर्माण चीन सरकारको सहयोगमा भएको हो । चाइनिज इन्जिनियरिङहरूबाट यो निर्माण भएको हो । यो बीआरआई परियोजनाअन्तर्गतको हो,’ राजदूत छन् सोङले भने । यसअघि गत पुसमा विमानस्थल उद्घाटन कार्यक्रममा चीनका कार्यवाहक राजदूत वाङ सिनले पनि पोखरा विमानस्थल चीनको महत्त्वाकांक्षी बीआरआई अन्तर्गत भएको दाबी गरेका थिए ।