अखबार नेपाल ट्रेन्डिङ

काठमाडौं: नेपाली कांग्रेसका सभापति शेरबहादुर देउवा संसदीय दलको नेता भएसँगै सरकार निर्माणका लागि दौडधुप सुरु भएको छ ।

राष्ट्रपति विद्यादेवी भण्डारीले नयाँ सरकार गठनका लागि बहुमत सांसदको समर्थन पेश गर्ने समय पुस १० गते साँझ ५ बजेसम्मलाई दिएकी छिन् ।

बुधबार भएको दलको निर्वाचनमा महामन्त्री गगन थापालाई ३९ मत अन्तरले पराजित गर्दै देउवा दलको नेता बनेका छन् । मंसिर ४ मा सम्पन्न प्रतिनिधि सभा र प्रदेश सभा चुनावमा कांग्रेस पहिलो पार्टी बनेको छ ।

यतिबेला सभापति देउवाले आफ्नै नेतृत्वमा सरकार बनाउने योजनामा छन् । दलको नेता चयन भएपछि उनलाई गठबन्धन र बाहिरका अन्य दलहरुसँग छलफल गर्न सहज भएको नेताहरु बताउँछन् ।

यसैबीच, सरकार निर्माणबारे छलफल गर्न गठबन्धनको बैठक बुधबार बस्न सक्ने नेताहरुले बताएका छन् । सरकार गठनमा राष्ट्रपतिले दिएको समयसीमाभित्रै गठबन्धनमा पद बाँडफाँटबारे छलफल थाल्न बैठक बस्नुपर्ने नेताहरु बताउँछन् ।

गठबन्धनले सरकार बनाएको अवस्थामा पहिलो प्रधानमन्त्री आफूले पाउनुपर्ने माओवादी अध्यक्ष पुष्पकमल दाहाल प्रचण्डले बताइरहेका छन् । तर यसअघिको कार्य सम्पादन समिति बैठकमा कांग्रेसले केन्द्रदेखि प्रदेशसम्म आफ्नो नेतृत्वमा सरकार बनाउने निर्णय लिइसकेको छ ।

अहिलेसम्म गठबन्धनबाट कसैले पनि प्रधानमन्त्रीको दाबी नगरेको ने‍ताहरुले बताएका छन् । कांग्रेसले पहिलो दल भएकाले आफ्नै नेतृत्वमा सरकार बनाउनुपर्ने बताएका छन् । उता प्रचण्डले आलोपालोको हिसाबमा आफू पहिले प्रधानमन्त्री हुनुपर्ने पक्षमा छन् ।

प्रचण्डले आलोपालो प्रधानमन्त्री हुने बताउँदै प्रतिनिधि सभाको परिणाम जे आएपनि पहिलो सरकारको नेतृत्व आफूले गर्ने समझदारी भएको बताएका छन् । कांग्रेसभित्र माओवादीलाई सरकारको नेतृत्व दिन नहुने मत पनि छ ।

संसदीय दलको नेतामा पराजित भएपछि महामन्त्री गगन थापाले प्रधानमन्त्रीमा आलोपालो गर्ने सहमति गरे आफूलाई मान्य नहुने चेतावनी दिएका छन् ।

कांग्रेसले दलको नेता चयन नगरी प्रधानमन्त्रीमा दौडधुप नगर्ने बताएपनि संसदको दोस्रो ठूलो शक्ति एमालेले पनि सरकार निर्माणकै प्रयास औपचारिक गरेको छैन ।

यद्यपि एमालेका नेताहरुले माओवादी केन्द्र, राष्ट्रिय स्वतन्त्र पार्टी, जनता समाजवादी पार्टी, राप्रपा लगायत दलका शीर्ष र दोस्रो तहका नेतासँग छलफल गरिसकेको छ ।

माओवादीलाई एमालेले प्रधानमन्त्री बन्न आग्रह गरिसकेको छ । यस्तै रास्वपालाई पनि सरकारमा ल्याउन एमाले तयार छ । एमाले अध्यक्ष ओलीले रास्वपा सभापति रवि लामिछानेसँग दुईपटक छलफल गरिसकेका छन् ।

एमालेले राष्ट्रपति आफूले लिएर प्रधानमन्त्री कुनै दललाई बनाउने प्रयास गरेको छ । गठबन्धनले सरकार बनाए केन्द्रदेखि प्रदेशतहका ३५ मुख्य र केही संवैधानिक पदहरुमा आफ्ना नेता-कार्यकर्ता सेट गर्न सक्नेछ ।

एमालेले पनि पाँच वर्ष सबै पद गुमाउनुभन्दा सरकार निर्माण गरेर आफ्ना नेता-कार्यकर्तालाई इन्गेज गर्न चाहेको छ । त्यही भएर एमालेले सरकार निर्माणका लागि भित्र भित्रै प्रयास गरिरहेको छ ।