अखबार नेपाल ट्रेन्डिङ

काठमाडौं: आम निर्वाचनको मतपरिणाम अनुसार चर्चित अनुहारहरु नेपाली कांग्रेस, नेकपा एमाले, माओवादी केन्द्र, जनता समाजवादी पार्टीका शीर्ष नेता नै पराजित भएका छन् ।

जनता समाजवादी पार्टीका अध्यक्ष उपेन्द्र यादव सप्तरी २ बाट जनमत पार्टीका अध्यक्ष सीके राउतसँग पराजित भए । यस्तै, नेकपा एमालेका बरिष्ठ उपाध्यक्ष ईश्वर पोखरेल काठमाडौं ५ बाट नेपाली कांग्रेसका प्रदीप पौडेलसँग पराजित भए । एमाले महासचिव शंकर पोखरेल नेकपा माओवादी केन्द्रकी रेखा शर्मासँग दाङ-२ बाट पराजित भए ।

त्यस्तै नेकपा माओवादी केन्द्रका महासचिव देवप्रसाद गुरुङ पनि एमाले उपमहासचिव पृथ्वीसुब्बा गुरुङसँग लमजुङ १ बाट पराजित हुन पुगे ।

पूर्वसभामुख ओनसरी घर्तीमगर काठमाडौं-२ बाट राष्ट्रिय स्वतन्त्र पार्टीकी सोविता गौतमसँग पराजित भइन् । भने माओवादी केन्द्रका नेतृ पम्फा भुषाल ललितपुर-३ बाट राष्ट्रिय स्वतन्त्र पार्टीका तोसिमा कार्कीसँग पराजित भईन् ।

नेपाली कांग्रेसका नेता एवम् पूर्वरक्षा मन्त्री भीमसेनदास प्रधान राष्ट्रिय स्वतन्त्र पार्टीका शिशीर खनालसँग काठमाडौं ६ बाट पराजित भए ।

जनता समाजवादी पार्टीका नेता मोहम्मद इस्तीयाक राई बाँके २ मा राप्रपाका धवलशमशेर जवरासँग पराजित भए । नेकपा एकीकृत समाजवादीका सचिव रामकुमारी झाँक्री पनि गुल्मी-२ बाट एमालेका सचिव गोकर्ण विष्टसँग पराजित भए ।

त्यस्तै नेकपा एकीकृत समाजवादीका सचिव विरोध खतिवडा एमालेका युवा नेता महेश बर्तौलासँग मकवानपुर-३ मा पराजित भए । भक्तपुर-२ मा एमाले नेता महेश बस्नेत कांग्रेसका दुर्लभ थापा क्षेत्रीसँग पराजित भए भने एमाले नेता अग्नी खरेल झापा १ बाट कांग्रेस महामन्त्री विश्वप्रकाश शर्मासँग पराजित भए ।

त्यसैगरी नेपाली कांग्रेसका नेता बलबहादुर केसी पनि सोलुखुम्बुबाट नेकपा एमालेका मानवीर राईसँग पराजित भएका छन् ।