अखबार नेपाल ट्रेन्डिङ

काठमाडौं: नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले काठमाडौं महानगर र धरान उपमहानगरका मेयरमा स्वतन्त्र उम्मेदवार अलिक विशिष्ट ढंगले आएको बताएका छन् ।

प्रचण्डले भने, ‘काठमाडौंको मेयर र धरानका मेयर अलिक विशिष्ट ढंगले आउनुभयो । बालेन र हर्क स्वतन्त्र रुपमा आउनुभयो । स्थानीय तहको निर्वाचनमा धरान र काठमाडौंमा जुन विचार र संकल्पसहित जनतामा प्रस्तुत हुनुभयो । यसलाई विशिष्ट मान्नुपर्छ । काठमाडौं र धरानमा संविधानभित्रै रहेर आउनुभएको हो । दुवै मेयरलाई धन्यवाद पनि दिन चाहन्छु । संघीय लोकतान्त्रिक गणतन्त्रात्मक व्यवस्थाअनुरुप दलहरुसँग समदुरी जुटाउन सक्नुस् ।’

काठमाडौं र धरानबाहेक अन्यत्रका स्वन्त्र भनिए पनि पार्टीकै नेता कार्यकर्ता भएको बताए । जनकपुर र धनगढीका स्वतन्त्र भनिएका उम्मेदवारको पछाडि दलकै कार्यकर्ता रहेको भन्दै उनीहरु स्वतन्त्र नभएको प्रचण्डको भनाइ थियो ।

बालेन र हर्कहरुको सफलतालाई राजनीतिक दललाई झापड, थप्पड र चुनौती भनेर आइराखेकोमा पनि उनले असहमति जनाए । आफूले चाहि विशिष्ट मान्ने उनले बताए । ‘मेरो विचारमा संघीय लोकतान्त्रिक गणतन्त्रको फुलबारीभित्र काठमाडौं र धरानमा फेरि नयाँ दुईटा फूलहरु फक्रिएको जस्तो लाग्छ । फुलबारी गणतन्त्र र संविधानकै हो,’ उनले भने ।

उनले घेराबन्दी चिरेर सफल हुन शुभकामना दिए । ‘इतिहासको कालखण्डमा यस्ता पात्र जन्मिन्छ । तर असफल पार्न घेराबन्दी हुन्छ । यसखालको घेराबन्दीबाट मुक्त राख्दै साच्चिकै सेवामा लाग्ने वातावरण बनोस्,’ उनले भने ।