अखबार नेपाल ट्रेन्डिङ

काठमाडौं: एमसीसी परियोजना अघि बढाउने विषयमा शनिबार गठबन्धनका प्रमुख तीन शीर्ष नेताहरुबीचको छलफल निष्कर्ष विहीन सकिएको छ ।

प्रधानमन्त्री शेरबहादुर देउवासँग एमसीसी परियोजनाकै विषयमा छलफल गर्न नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ र नेकपा एकीकृत समाजवादीका अध्यक्ष माधवकुमार नेपाल शनिबार बालुवाटारमा पुगेका थिए ।

प्रधानमन्त्रीसँगको छलफलमा कुनै ठोस कुराकानी नभएको प्रधानमन्त्रीका प्रेस सल्लाहाकार गोविन्द परियारले जानकारी दिए ।

‘एमसीसी लगायतका विषयमा नै तीन नेताहरुबीच छलफल भएको हो,’ उनले भने, ‘छलफल निष्कर्षविहीन भयो । फेरि नेताहरुबीच छलफल हुने कुरा छ ।’

आजको बैठकमा पनि तीनवटै नेताहरुले आ-आफ्नो अडान कायमै राखेका थिए ।

स्रोतका अनुसार आजको बैठकमा प्रधानमन्त्री शेरबहादुर देउवाले संसद्को आउने बैठकमा एमसीसी टेबल गर्नुपर्ने प्रस्ताव प्रचण्ड र नेपालसमक्ष थिए ।

तर, उक्त प्रस्ताव प्रचण्ड र नेपालले अस्वीकार गरेका छन् ।

एमसीसी सम्झौता संसद्‌बाट अनुमोदन गर्ने विषयमा सत्ता गठबन्धनभित्र नै मतभेद देखिएको छ ।

प्रधानमन्त्री जसरी पनि एमसीसी सम्झौता अघि बढाउनुपर्ने पक्षमा देखिए पनि अन्य साझेदार दल भने सहमत भइसकेका छैनन् ।