अखबार नेपाल ट्रेन्डिङ

काठमाडौं: काठमाडौंमा जारी नेकपा माओवादी केन्द्रको ८औं महाधिवेशनबाट केन्द्रीय कमिटी सदस्यका चयनका लागि आइतबार बिहानदेखि मतदान हुने भएको छ ।

निर्वाचन समितिले जारी गरेको कार्यतालिका अनुसार बिहान ११:३० बजेदेखि मतदान सुरु हुनेछ ।

निर्वाचन कार्यतालिका अनुसार आज राति ८ बजेदेखि साढे १० बजेसम्म उम्मेद्वारी दर्ताका लागि समय छुट्टाइएको छ ।

उम्मेद्वारको अन्तिम नामावली प्रकाशन भोलि बिहान ११:१५ बजे हुने जनाइएको छ ।

मतदान बिहान ११:०० बजेदेखि दिउँसो ४ बजेसम्म हुने निर्वाचन समितिले जनाएको छ ।

पार्टीको विधान अनुसार माओवादी केन्द्रको केन्द्रीय कमिटी सदस्य २९९ रहेको छ ।

जसमा ५० प्रतिशत खुल्ला र ५० प्रतिशत पूर्ण समानुपातिक आधारमा सदस्य चयन हुने माओवादीले व्यवस्था गरेको छ ।

निर्वाचन समितिले निर्वाचन प्रकृया अगाडि बढाउँदै १७४२ जना प्रतिनिधिको नाम टाँस गरिसकेको छ ।

नाममा असहमति भए त्यसविरुद्ध उजुरीको व्यवस्था छ । बेलुका ६ बजे टाँस गरिने नामको सूचीपछि कुनै उजुरी लाग्ने छैन ।

महाधिवेशनले केन्द्रीय कमिटी, केन्द्रीय कमिटीले पोलिट्व्यूरो, स्थायी कमिटी र पदाधिकारी चयन गर्नेछ ।

पोलिटव्यूरो, स्थायी कमिटी र पदाधिकारी समावेशी सिद्धान्तका आधारमा चयन हुनेछ ।

५० प्रतिशतको पूर्ण समानुपातिकमा दलित, मुस्लिम, थारु, मधेसी, आदिवासी जनजाति, खस आर्य, अपांगता, पिछडिएको क्षेत्र, महिला र युवाको क्लस्टर बनाइएको छ ।

केन्द्रीय कमिटीमा सबै क्लस्टर र खुल्लाबाट गरी ३५ प्रतिशत महिला र २० प्रतिशत ४० वर्ष मुनिका युवाको प्रतिनिधित्व हुनेछ ।