अखबार नेपाल ट्रेन्डिङ

काठमाडौं: नेकपा एमाले अध्यक्ष केपी शर्मा ओलीविरुद्ध दर्ता भएको अदालतको अवहेलना मुद्दा पेसीमा चढेको छ ।

तत्कालीन प्रधानमन्त्रीका रुपमा दिएको अभिव्यक्तिका कारण दर्ता भएको मुद्दा न्यायाधीश अनिलकुमार सिन्हा र हरिप्रसाद फुयाँलको इजलासमा पेसी चढेको छ ।

२०७७ माघ १३ गते ओलीले प्रतिनिधिसभा विघटनको मुद्दाको बहस चलिरहँदा दिएको अभिव्यक्तिले अदालतको अवहेलना भएको भन्दै वरिष्ठ अधिवक्ता कुमार शर्मा आचार्य र कञ्चनकृष्ण न्यौपानले अवहेलना निवेदन दायर गरेका थिए ।

पुस ५ गते ओलीले बहुमतको सरकार सञ्चालन गरिरहँदा संविधानले नदिएको अधिकार प्रयोग गरी प्रतिनिधि सभा विघटन गरेर नयाँ निर्वाचन घोषणा गरेका थिए । उक्त घोषणा असंवैधानिक भएको भनी सर्वोच्चमा रिट दायर भएको थियो ।

उक्त रिटमाथि संवैधानिक इजलासमा वहस चलिरहँदा उनले अदालतले आफूले गरेको निर्णय उल्ट्याउन नसक्ने र बाजे वकिललाई समेत लगेर कानुन व्यवसायीहरुले तमासा गरेको टिप्पणी गरेका थिए ।

अवहेलना मुद्दा दर्ता भएपछि ओली फागुन ६ गते लिखित जवाफ लिएर आफैं उपस्थितसमेत भएका थिए । सर्वोच्च अदालतले अवहेलना सम्बन्धी मुद्दामा जवाफसहित आफैं उपस्थित हुन माघ १५ मा आदेश दिएको थियो ।