अखबार नेपाल ट्रेन्डिङ

काठमाडौं: नेकपा (एमाले) ले १०औं महाधिवेशनको नेतृत्व चयन प्रक्रियालाई छरितो बनाउन बन्दसत्रको कार्यक्रम ३ घण्टाभित्रै सिध्याएर निर्वाचन प्रक्रिया आरम्भ गर्ने भएको छ ।

१० मंसिरमा नारायणी नदी किनारमा महाधिवेशन उद्घाटन भएपछि बन्दसत्र र निर्वाचन कार्यक्रम भने पर्यटकीय नगरी सौराहमा हुनेछ ।

११ मंसिर बिहानदेखि बन्दसत्र सुरु हुनेछ । बन्दसत्रको सुरुवातसँगै अध्यक्ष मण्डलले कार्यक्रम सञ्चालन गर्ने, समसामयिक राजनीतिक विषयमा प्रस्ताव पेस र लगत्तै पारित गर्ने कार्यक्रम छ ।

महाधिवेशन सफलताको शुभकामना दिन सशरीर उपस्थित हुने विदेशी अतिथिहरुले बन्दसत्रभित्रै शुभकामना दिने कार्यक्रम तय गरिएको छ ।

विदेशी राजनीतिक दलहरुले पठाएका शुभकामना सन्देश पनि बन्दसत्रभित्रै पढेर सुनाइनेछ । बन्दसत्रको कार्यक्रम ३ घण्टाभन्दा बढी नलम्ब्याउने योजना एमालेले बनाएको छ ।

बन्दसत्रमा सम्बोधन, समसामयिक राजनीतिक प्रस्ताव पेस र पारित भएसँगै निर्वाचन प्रक्रिया सुरु हुनेछ । निर्वाचन सञ्चालनका लागि बन्दसत्रबाटै ‘निर्वाचन आयोग’ गठन हुनेछ ।

निर्वाचन प्रक्रिया अन्तर्गत मनोनयन पत्र दर्ता, दाबी/विरोध र अन्तिम नामावली प्रकाशन लगायतका काम साँझ ५ बजेसम्म सम्पन्न भइसक्नेछन् ।

मनोनयन र उम्मेदवारहरुको अन्तिम नामावली प्रकाशन गर्ने काम अपरान्ह पाँच बजेसम्म सम्पन्न भएपछि विद्युतीय मतपेटिकामा उम्मेदवारहरुको नाम समावेश गर्ने काम ११ मंसिर साँझदेखि नै सुरु हुनेछ ।

१२ मंसिरको बिहान ८ बजेदेखि सुरु हुने मतदान प्रक्रिया बेलुकी ५ बजेसम्म हुनेछ ।

महाधिवेशनमा करिब २ हजार २ सय प्रतिनिधि हुनेछन् भने एक सय वटा विद्युतीय मतपेटिका राखिनेछन् । मतदान गर्दा एक जनालाई २० देखि २५ मिनेटसम्मको समय लाग्ने अनुमान गरिएको छ । यस आधारमा करिब ८ घण्टाभित्र मतदान कार्य सम्पन्न हुने अनुमान एमालेले गरेको छ ।

रुपन्देहीको मतगणना स्थलमा कुटाकुट, उम्मेदवारसहित ५ जना घाइते