अखबार नेपाल ट्रेन्डिङ

काठमाडौं: तत्कालीन नेकपा (एमाले) र नेकपा (माओवादी केन्द्र) बीच भएको पार्टी एकीकरण प्रकृयाले ११ महिनापछि मात्रै मुर्तरुप पाउने भएको छ । लामो समयदेखि अल्झिएको एकता प्रकृया टुंग्याउन नेकपाका शीर्ष नेताहरु छलफलमा जुटेका छन् ।

नेकपाका शीर्ष नेताहरु अध्यक्षद्वय केपी शर्मा ओली र पुष्पकमल दाहाल ‘प्रचण्ड’, वरिष्ठ नेता माधवकुमार नेपाल र महासचिव विष्णु पौडेल छलफलमा जुटेर एकीकरण प्रकृयालाई अन्तिम रुप दिईने बताईएको छ । एकीकरण प्रक्रियामा आफूलाई कम आँकलन गरिएको भन्दै वरिष्ठ नेता माधवकुमार नेपाल असन्तुष्ट थिए । उहाँसँगको छलफलपछि एकीकरण टुंगोमा पुग्न लागेको हो ।

शुक्रबार र शनिबार दुई अध्यक्षसहित नेपाल र पौडेलले एकीकरणका सम्बन्धमा छलफल गरी एकता प्रकृयालाई टुंग्याउने सैद्धान्तिक सहमति गर्नुभएको थियो । कम्युनिस्ट पार्टी स्थापना दिवसको दिन पारि बैसाख ९ अर्थात सोमबार एकता प्रक्रिया टुंग्याउने तयारी भएका नेकपाले जानकारी दिएको छ । नेताहरुबीच सहमति नजुट्दा जिल्ला सहितका तल्लो तह तथा जनवर्गीय संगठनहरुको एकता पछिल्लो ११ महिनादेखि अल्झिरहेको थियो ।

चार शीर्ष नेताबीच जिल्ला अध्यक्ष र सचिवहरूको सूची टुंग्याउन केही नीतिगत र सैद्धान्तिक विषयमा सकारात्मक छलफल भएको छ । आज बैठक बसी शीर्ष नेताहरुबीच छलफल हुने र एकताको प्रस्तावलाई अन्तिम रूप दिइने ‍बताइएका छ ।