अखबार नेपाल ट्रेन्डिङ

चितवन : बाघको आक्रमणमा परी आज चितवनमा एक जनाको मृत्यु भएको छ । आक्रमणमा परी रत्ननगर नगरपालिका–६ का ५५ वर्षीय बबना चौधरीको मृत्यु भएको हो ।

स्थानीय कुमरोज मध्यवर्ती सामुदायिक वनभित्र हात्ती चराउदै घाँस काट्न जाँदा बाघले आक्रमण गरेको चितवन राष्ट्रिय निकुञ्जका सूचना अधिकारी अशोक रामले जानकारी दिए । जरायो मारेर शिकार गरिरहेको अवस्थामा उनी घाँस काट्न त्यहाँ पुगेपछि बाघले एक्कासी आक्रमण गरेको रामले जानकारी दिए ।

बिहान १०ः२५ बजेको समयमा घटना भएको सूचना प्राप्त भएपछि सो क्षेत्रमा प्रहरी परिचालन गरिएको इलाका प्रहरी कार्यालय खैरहनीले जनाएको छ । मृतकको शव घटनास्थल नजिकै फेला परेको प्रहरीले जनाएको छ ।

यसअघि गत शनिबार पनि पश्चिम चितवनमा बाघको आक्रमणबाट एक जनाको ज्यान गएको थियो । यसरी आक्रमण गर्ने बाघलाई निकुञ्जले नियन्त्रणमा लिएर कसरामा राखेको बताईएको छ ।