अखबार नेपाल ट्रेन्डिङ

काठमाडौं: बारा र पर्सामा आएका हावाहुरीबाट ठूलो जनधनको क्षति भएपछि मन्त्रिपरिषद्को आकस्मिक बैठक बस्ने भएको छ । पूर्वी तराईका जिल्लामा विभिन्न कार्यक्रम लिएर पुगेका प्रधानमन्त्री केपी शर्मा ओली उक्त घटनापछि भ्रमण छोट्याएर काठमाडौं आउने भएका छन् ।

प्रधानमन्त्री आए लगत्तै मन्त्री परिषद् बैठक बस्ने तयारी भएको एक मन्त्रीले बताए । बैठक बारा पर्साको घटनामा केन्द्रित हुनेछ । बारा, पर्सामा राति आएको हावाहुरीका कारण ३१ जनाको मृत्यु भएको छ । ५ सय भन्दा बढी व्यक्ति घाइते भएका छन् ।

यसैबीच प्रधानमन्त्री केपी शर्मा ओली हावाहुरी प्रभावित जिल्ला बारा र पर्सा जाने भएका छन् । आफ्नो पूर्वनिधारित सबै कार्यक्रम स्थगित गर्दै प्रभावित क्षेत्रमा जान लागेको प्रधानमन्त्रीका प्रेस संयोजक चेतन अधिकारीले जानकारी दिए ।

झापामा रहेका प्रधानमन्त्री हेलिकोप्टरमार्फत बारा जाँदै गरेको अधिकारीले बताए । प्रधानमन्त्रीले यो घटना दुःखद भन्दै गहिरो समवेदना प्रकट गरेका थिए । उनले उद्धार तथा राहतमा कुनै कसर नराख्न निर्देशन दिएका थिए ।