अखबार नेपाल ट्रेन्डिङ

काठमाडौं: नेत्रविक्रम चन्द ‘विप्लव’ नेतृत्वको नेकपाका स्थायी समिति सदस्य तथा मध्य कमान्डर हेमन्तप्रकाश ओली ‘सुदर्शन’ पक्राउ परेका छन् ।

प्रदेश ३ प्रहरी, महानगरीय अपराध महाशाखा, विशेष ब्युरो र जिल्ला प्रहरी कार्यालय काभ्रेको टोलीले ओलीलाई नियन्त्रणमा लिएको हो । प्रहरी स्रोतका अनुसार उनीसहित विप्लव नेकपाका ८ नेता कार्यकर्तालाई पक्राउ गरिएको प्रहरीले जानकारी दिएको छ ।

उच्च प्रहरी स्रोतका अनुसार सुदर्शनसहितको टोली काठमाडौं आइरहेका बेला अपरेसनमा खटिएको प्रहरी टोलीले नियन्त्रणमा लिएको हो । उनीहरू निजी गाडीमा काठमाडौं आइरहेको बेला प्रहरीले नियन्त्रणमा लिएको हो । सुदर्शनसहित धर्मराज राजबाहक, रामकृष्ण खतिवडा, शंकर अधिकारी, विजय श्रेष्ठ, ललित तामाङ, सञ्जीव कार्की, देव घिमिरे र लोकेन्द्र खड्का पक्राउ परेका हुन् । प्रहरीले उनीहरूलाई काठमाडौं ल्याउने तयारी गरिररहेको छ ।

विप्लव नेकपाका तीनवटा कमान्डमध्ये उपत्यका हेर्ने मध्य कमान्डका प्रमुख हुन् सुदर्शन । उनले गत फागुन १० गते ललितपुरको नख्खुमा एनसेल मुख्यालय बाहिर भएको बम विस्फोटको जिम्मेवारी लिएका थिए । बिस्फोटमा एकजनाको मृत्यु र दुइजना घाइते भएका थिए । प्रहरीले मंगलबार काभ्रेको काफलडाँडामा गरेको अपरेसनका क्रममा सुदर्शन भाग्न सफल भएका थिए । प्रहरीले उनको खोजी गरिररहेको थियो ।