अखबार नेपाल ट्रेन्डिङ

काठमाडौं: काठमाडौं उपत्यका सहित देशभरको तापक्रम केही दिनयता निरन्तर बढिरहेको मौसमविद्ले बताएका छन् । अझै केही दिन वर्षाको खासै सम्भावना नरहेकाले गर्मी बढ्ने देखिएको मौसम पूर्वानुमान महाशाखाले जनाएको छ ।

मौसम महाशाखाले आइतबार यस वर्षकै उच्च तापक्रम देखिएको घोषणा गरेको थियो । जुन दिन धनगढीमा देशमै सबैभन्दा बढी ४०.१ डिग्री तापक्रम देखिएको थियो भने दिपायलमा ४० डिग्री तथा काठमाडौं उपत्यकामा समेत ३१.८ डिग्री अधिकतम तापक्रम पुगेको थियो ।

तर सोमबार तापक्रम अझ बढेको छ । महाशाखाको रेकर्ड अनुसार सोमबार देशभरिमा सबैभन्दा बढी भैरहवामा अधिकतम तापक्रम ४२.२ डिग्री पुगेको छ । यसपछि धनगढी र नेपालगन्जमा समान ४१.५ डिग्री सेल्सियस पुगेको छ भने काठमाडौं उपत्यकामा समेत सोमबार ३२.३ डिग्री पुगेको छ । महाशाखाले देशभर स्थापना गरेको २० स्टेसनमध्ये धेरैजसोको तापक्रम ३० भन्दा माथि देखिएको छ ।

अझै दुई-तीन दिन तापक्रम बढ्ने र आज काठमाडौं उपत्यकासहित मध्य, पूर्वका भूभागमा तथा पश्चिम पहाडका एक-दुई स्थानमा अपराह्नपछि वा साँझपख हावाहुरी, चट्याङसहित वर्षा हुने सम्भावना रहेको महाशाखाले जनाएको छ ।