अखबार नेपाल ट्रेन्डिङ

काठमाडौं: प्रधानमन्त्री केपी शर्मा ओलीले आज साँझ ५ बजेका लागि मन्त्रिपरिषदको बैठक बोलाएका छन् । बैठकमा भारतद्वारा अतिक्रमित भूमिसहितको नक्सा सार्वजनिक पछि उत्पन्न परिस्थिति, प्रतीकलगायत राष्ट्रिय चिन्ह परिवर्तनका लागि फास्ट ट्र्याकमार्फत संविधान संशोधन लगायतका विषयमा आज छलफल हुने एक मन्त्रीले बताए ।

बैठकमा सरकारले ल्याउन लागेको आगामी आर्थिक वर्ष २०७७/७८ को बजेट, एमसीसी परियोजनका विषयमा पनि छलफल हुनेछ । त्यस्तै विदेशमा अलपत्र परेका नेपालीलाई स्वदेश फर्काउने विषयमा पनि छलफल हुने बुझिएको छ । यसअघिको मन्त्रिपरिषद बैठकले सरकारले सार्वजनिक गरेको नयाँ नक्सा कार्यान्वयनमा ल्याउन संविधान संशोधन गर्ने निर्णयसहित संविधान संशोधनको प्रस्ताव संसदमा दर्ता गरेको छ ।

बैठकलगत्तै प्रधानमन्त्री ओलीले राष्ट्रका नाममा सम्बोधन गर्ने कार्यक्रम रहेको छ । साँझ ५ बजेका लागि बोलाइएको मन्त्रिपरिषद बैठक सकिए लगत्तै साढे ५ बजे नेपाल टेलिभिजनबाट प्रधानमन्त्रीले राष्ट्रका नाममा सम्बोधन गर्ने कार्यक्रम रहेको प्रधानमन्त्रीका प्रेस सल्लाहकार सूर्य थापाले जानकारी दिएका छन् ।