अखबार नेपाल ट्रेन्डिङ

काठमाडौं: बंगालको खाडीमा विकसित शक्तिशाली आँधी अर्थात् चक्रवातको प्रभाव नेपालमा पर्न सुरु भएको छ । यसैको अप्रत्यक्ष प्रभावले आज विहान काठमाडौं उपत्यकासहित देशको मध्ये क्षेत्रमा वर्षा भएको मौसम पूर्वानुमान महाशाखाले जनाएको छ ।

मौसम पूर्वानुमान महाशाखाका अनुसार त्यस शक्तिशाली चक्रवातको बाहिरी घेराको बादल मात्र अहिले नेपाल आइरहेको छ । अहिले त्यो चक्रवात बंगालको खाडीमै छ र जमिनमा प्रवेश गरिसकेको छैन । यो भारतको जमिनमा प्रवेश गरेपछि यसको असर ठूलो हुनेछ र नेपालमा पनि बढी प्रभाव पर्नेछ ।

शक्तिशाली चक्रवातको बाहिरी घेराको बादल काठमाडौं लगायत देशको मध्य भागमा मात्रै आइपुगेको छ । सोही कारण आज बिहानै काठमाडौंलगायत आसापासका क्षेत्रमा वर्षा भएको हो । आज देशका मध्य र पूर्वी क्षेत्रका केही स्थानमा हावाहुरीसहित वर्षा हुने सम्भावना छ । मौसम पूर्वानुमान महाशाखाले यसअघि नै विशेष बुलेटिन जारी गरेर बंगालको खाडीमा अम्पुन नामको अति शक्तिशाली चक्रवात विकास भइसकेको र त्यो क्रमशः उत्तरतर्फ अघि बढ्दै गरेकाले नेपालमा पनि वर्षा तथा हिमपात हुने सम्भावना रहेको भन्दै होसियारी अपाउन आग्रह गरिसकेको छ ।