अखबार नेपाल ट्रेन्डिङ

काठमाडौं: विप्लव नेतृत्वको नेकपाले आह्वान गरेको नेपाल बन्दको प्रभाव आंशिक रुपमा राजधानी सहित देशभर परेको छ । राजधानीमा अरु दिनको तुलनामा केही कम सवारी साधन चलेपनि बन्दकर्ता सडकमा भने देखिँएका छैनन् ।

अधिकांश स्कुल कलेज भने बन्द छन् । यस्तै बजार उद्योग तथा कलकारखानामा पनि बन्दको सामान्य प्रभाव देखिएको छ । विप्वलको बन्दलाई प्रभावहीन बनाउन राजधानीका चोकचोकमा बाक्लो संख्यामा सुरक्षाकर्मी परिचालन गरिएको छ । त्यस्तै जिल्लामा पनि बन्दको सामान्य प्रभाव रहेको हाम्रा जिल्ला सहकर्मीहरुले जनाएका छन् ।

यसैबिच पोखराका २ स्थानमा बम फेला परेका छन् । भने गोरखामा पनि क्याम्पसरोड र बाह्रकिलामा पनिे शंकास्पद बस्तु भेटिएको छ । शंकास्पद बस्तुलार्इ सेनाको डिस्पोजल टोलीले डिस्पोज गरेको छ । कैलालीमा पनि म १ ख ४४१ नम्बरको विवाहको गाडिमा आगजनी भएको छ । बन्द गर्दै हिडेका विप्लव माओवादीका तीन जना प्रहरीले नियन्त्रणमा लिएको छ ।

त्यसैगरी उत्तरी मकवानपुरको थाहा नगरपालिका ४ नयागाउँमा काठमाडौंबाट हेटौंडातर्फ आइरहेको ना ५ ख ७४११ नम्बर ट्रकमा अज्ञात समुहले पेट्रोल खन्याएर अगजनी गरेको छ । आफ्नो पक्राउ परेका नेता कार्यकर्तालाई रिहा गरिनुपर्ने, देशव्यापी धरपकड रोकिनुपर्ने लगायतका माग गर्दै विप्लव समूहले बन्दको आह्वान गरेको हो । पछिल्लो पटक सरकारले विप्लव समूहलाई प्रतिबन्धनै लगाएपछि सो पार्टीले पहिलो पटक नेपाल बन्दको आह्वान गरेको हो ।