अखबार नेपाल ट्रेन्डिङ

काठमाडौं: भृकुटीमण्डपमा यही माघ २४ देखि २९ गतेसम्म सञ्चालन भएको क्यान इन्फोटेक २०२३ मेलामा ३ लाख मानिसले अवलोकन गरेका छन् ।

आइतबार मेलामा ३ लाख मानिसहरुले मेलाको अवलोकन गरेको कम्प्युटर एशोसिएशन महासङ्घले जनाएको छ । मेलामा विद्यालयमा अध्ययनरत विद्यार्थीदेखि क्याम्पस स्तरमा टेक्नोलोजी अध्ययनरत विद्यार्थी र सूचना प्रविधिमा चासो राख्ने मानिसहरु अवलोकनका लागि आएको महासङ्घले जनाएको छ ।

क्यान इन्फोटेक आगामी दिनमा सात प्रदेशमा पनि सञ्चालन हुने महासङ्घले जनाएको छ । महासङ्घका अनुसार मधेस प्रदेशमा फागुन ५ देखि फागुन ९ गतेसम्म, सुदूरपश्चिम प्रदेशमा फागुन १३ देखि फागुन १७ गतेसम्म, गण्डकी प्रदेशमा फागुन २६ देखि फागुन ३० गतेसम्म र बागमती प्रदेशमा चैत २ देखि चैत ६ गतेसम्म क्यान इन्फोटेक हुने छ ।

प्रदेश १, कर्णाली र लुम्बिनी प्रदेशमा पनि चाँडै नै क्यान इन्फोटेकको आयोजना मिति घोषणा हुने बताइएको छ ।

मुख्य प्रायोजक आइएमई पे

सूचना तथा सञ्चार प्रविधि र मनोरञ्जन सम्बन्धि देशको एकमात्र प्रदर्शनीको कोभिड-१९ कारण दुईपटक स्थगित भएको क्यान इन्फोटेकको मुख्य प्रायोजन डिजिटल वालेट ‘आइएमई पे’ रहेको थियो ।

प्रर्दशनीमा विभिन्न राष्ट्रिय र अन्तर्राष्ट्रिय सूचना तथा सञ्चार प्रविधिसम्बन्धि कम्पनी एवम् उत्पादनहरूको सहभागिता रहेको थियो ।

यस पटकको इन्फोटेक पेपरलेस र क्यासलेस प्रवेश टिकटको व्यवस्था गरिएको थियो जसमा प्रवेश शुल्क जम्मा १ रुपैयाँ मात्र तोकिएको थियो भने प्रवेश टिकटलाई आइएमई पेले व्यवस्थापन गरेको थियो ।