अखबार नेपाल ट्रेन्डिङ

काठमाडौं:  नेपालमा हावाहुरीसँगै अति भारी वर्षा हुन सक्ने देखिएको छ । बंगालको खाडीमा विकास ‘यास’ चक्रवातले नेपालमा हावाहुरीसँगै  अति भारी वर्षा हुन सक्ने देखिएको हो ।

नेपालमा  प्रदेश १, प्रदेश २, बाग्मती प्रदेश, गण्डकी प्रदेश र लुम्बिनी प्रदेशका केही स्थानहरूमा भारी, अति भारी वर्षा र उच्च बेगको हावाहुरीको सम्भावना रहेको मौसम पूर्वानुमान महाशाखाले जनाएको छ।

चक्रवात भारतको  पूर्वी  क्षेत्र  उडिसा  र  पश्चिम  बंगालमा  अवतरण  भएसँगै  पश्चिम–उत्तरबाट  पश्चिम सर्ने क्रममा कमजोर हुँदै न्यून चापीय क्षेत्रका रूपमा विकास भएकाले यसको प्रभाव नेपालमा पनि पर्ने देखिएको महाशाखाले जनाएको छ ।

नेपालको पूर्वी भूभागहुँदै चक्रवातबाट विकास भएको गहन न्यून चापीय रेखा भित्रिएकोले बिहीबारदेखि नै विभिन्न क्षेत्रमा उच्च हुरीबताससँगै वर्षा भइरहेको छ । यो क्रम शनिबार दिउँसोसम्म कायम  रहने मौसम पूर्वानुमान महाशाखाले जनाएको छ।

शुक्रबार बिहानदेखि नै देशभर सामान्यदेखि पूर्ण बदली रही धेरै स्थानहरूमा मेघगर्जन, चट्याङ र हावाहुरीसहित कतै हल्का र कतै मध्यम वर्षा भइरहेको र यो आज रातिसम्मै जारी रहन सक्ने मौसम पूर्वानुमान महाशाखाले जनाएको छ।

उच्च हिमाली र पहाडी भूभागका धेरै स्थानमा हल्कादेखि मध्यम हिमपात र वर्षा साथै गण्डकी प्रदेशका केही स्थानहरूमा  बागमती प्रदेश, प्रदेश १ तथा सुदूरपश्चिम प्रदेशका उच्च हिमाली र पहाडी भूभागका १–२ स्थानमा  भारी हिमपातको सम्भावना रहेको महाशाखाले जनाएको छ।

यो पनि पढ्नुहोस् :

काठमाडौँ उपत्यकामा आजदेखि निषेधाज्ञामा थप कडाइ