अखबार नेपाल ट्रेन्डिङ

सिन्धुपाल्चोक : बलात्कारको घटना दिनानुदिन बढ्दो मात्रामा छ । केही हप्ता अगाडी सम्झना कामीको बलात्कारको घटना सेलाउन नपाउदै भक्तपुरमा एक युवती सामुहिक बलात्कारमा परिन । फेरी अहिले त्यस्तै खबर बाहिर आएको छ ।

सिन्धुपाल्चोककी एक महिला सामुहिक बलात्कारको सिकार भएकी छन् । किनमेलका लागि बजार आएकी सिन्धुपाल्चोक जुगल गाउँपालिकाकी एक ३२ वर्षीया महिलामाथि सामुहिक बलात्कार भएको हो ।

गत असोज १५ गते राति चार जना पुरुषहरुले उनीमाथि सामुहिक बलात्कार गरेका हुन् । किनमेलका लागि जलबीरे बजार आएकी महिलालाई मादक पदार्थ सेवन गरेका चार जना पुरुषले बोलेर जीपभित्र हालेर सामुहिक बलात्कार गरेको खुल्न आएको जिल्ला प्रहरी कार्यालयका प्रहरी नायव उपरीक्षक प्रकास सापकोटाले बताए ।

बजारबाट घर फर्किदै गरेकी महिलालाई मोटरसाइकलमा आएका व्यक्तिहरुले घर पुर्‍याई दिन्छुु भनेर कातिकेमाथि मञ्ने भन्ने ठाउँमा पुगेपछि बोलेरो जीपभित्र हालेर बलात्कार गरेको पाइएको सापकोटाले बताएका छन् ।

घटनामा संलग्न ४ जनामध्ये दुई जनाको पहिचान खुलेको छ । पहिचान खुलेका दुई जना स्थानीय नै रहेको प्रहरीको भनाइ छ । हालसम्म उनीहरु पक्राउ परेका छैनन् ।

बलात्कृत महिला विवाहित रहेको र उनको सन्तान समेत रहेको प्रहरीले जनाएको छ । उनी मानसिक रुपमा निकै विक्षिप्त भएको र अहिले उनी प्रहरीको संरक्षणमा रहेको बताइएको छ ।