अखबार नेपाल ट्रेन्डिङ

काठमाडौं: कोरोनाको तेस्रो लहर सुरु भएसँगै पीसीआर विधिबाट गरिने परीक्षणमा सङ्क्रमण दर ५६.८ प्रतिशत पुगेको स्वास्थ्य तथा जनसङ्ख्या मन्त्रालयको तथ्याङ्कले देखाएको छ ।

नयाँ सङ्क्रमितहरू मध्ये सबैभन्दा धेरै २१ देखि ३० वर्ष उमेर समूहका छन् । यो उमेर समूहबाट २ हजार ८ सय ७० जना सङ्क्रमित भएका छन् ।

त्यस्तै, ३१ देखि ४० उमेर समूहबाट २ हजार २४४ जना सङ्क्रमित छन् । १० वर्षभन्दा कमका १ सय ४६ जना सङ्क्रमित थपिएका छन् ।

पछिल्लो २४ घण्टामा काठमाडौंमा सबैभन्दा बढी ३ हजार ७ सय ६३ जना सङ्क्रमित थपिएका छन् । त्यसपछि ललितपुरमा १ हजार १ सय १० तथा भक्तपुरमा ४ सय ३४ जना सङ्क्रमित थपिएका छन् ।

प्रदेश १ मा मोरङमा २ सय ७३, मधेस प्रदेशमा सप्तरीमा ५५ जना र गण्डकीमा कास्कीमा ४ सयजना सङ्क्रमित थपिएका छन् ।

पाँच सयभन्दा बढी उपचारार्थ सङ्क्रमित रहेका जिल्लाहरूमा मोरङ, सुनसरी, झापा, धनुषा, काठमाडौं, ललितपुर, भक्तपुर, चितवन, मकवानपुर, काभ्रेपलाञ्चोक, कास्की, नवलपरासी पूर्व, बाँके, रुपन्देही र कैलाली रहेका छन् ।

हालसम्म देशमा ११ हजार ६ सय ५१ जना सङ्क्रमितले ज्यान गुमाइसकेका छन् । नेपालमा प्रति दश लाख जनसङ्ख्या ३८३.५ जनाको मृत्यु भएको मन्त्रालयको भनाइ छ ।

यही अवधिमा थप ७ सय ८ जना सङ्क्रमणमुक्त पनि भएका छन् । नेपालमा कूल सङ्क्रमितमध्ये ८ लाख २० हजार २ सय ८३ जना सङ्क्रमणमुक्त भइसकेका छन् ।

निको हुने दर घटेर ९०.७ प्रतिशत पुगेको छ । देशभर हाल ७२ हजार ८ सय ६२ जना सक्रिय सङ्क्रमित रहेका छन् ।

मन्त्रालयका अनुसार थप १ लाख ९६ हजार ८ सय ५७ जनाले कोरोनाभाइरस विरुद्धको खोप लगाएका छन् । हालसम्म १ करोड ६२ लाख ४२ हजार ४ सय ५६ जनाले पहिलो मात्रा, १ करोड २८ लाख ७० हजार ८ सय ६७ जनाले पूर्ण मात्र र १ लाख ४२ हजार ५ सय ८९ जनाले अतिरिक्त मात्रा खोप लगाएका छन् ।