अखबार नेपाल ट्रेन्डिङ

काठमाडौं:  देशभर लकडाउन तथा निशेधाज्ञा जारी  भएसंगै  रगत संकलन कार्य हुन नसक्दा रगत अभाव हुन थालेका छ । देशभरिका रगत सङ्कलन केन्द्रहरूमा रगत मौज्दात नहुँदा रगत अभाव भएको हो ।

रगत अभाव भए पछि शल्यक्रिया गर्नुपर्ने, प्रसूति, थालसेमिया, मुटु, क्यान्सर, मिर्गौला तथा नियमित रूपमा रगत फेर्नुपर्ने बिरामीहरू धेरै मर्कामा परेका छन् ।

केन्द्रिय रक्तसञ्चार सेवाका मानवीय मूल्य तथा सञ्चार विभागका निर्देशक दिव्य राज पौडेलका अनुसार कोरोना महामारीका कारण रक्तदाताले रगत दान गर्न छोडे पछि रगतको अभाव सृजना भएको हो । हाल केहि स्थानमा रगत संकलन कार्य भए पनि त्यो अझै पर्याप्त नभएको पौडेलको भनाई छ ।

राजधानीमा मात्र नभएर धरान, विराटनगर, चितवन, पोखरा धनगढि, नेपालगञ्ज लगाएत स्थानमा समेत माग अनुरुप रगत संकलन कार्य नभएको केन्द्रिय रक्तसञ्चार सेवाको भनाई छ । राजधानी बाहिरका क्षेत्रका अधिकांश भागमा समेत निषेधाज्ञा तथा लकडाउन रहेकाले रगत संकलन कार्य हुन सकेको छैन ।

प्रत्येक हप्ता सरदर ३,००० पिन्टभन्दा बढी रगतको माग भएपनि संक्रमणको त्रासका कारण रक्तदान हुन सकेको छैन ।