अखबार नेपाल ट्रेन्डिङ

एजेन्सीः बंगलादेशको प्रधानमन्त्री रहेकी शेख हसिनाले विवादास्पद चुनाव जितेर लगातार चौथो कार्यकाल विजयी हात पारेकी छिन् । हसिनाको पार्टी अवामी लिग र उनका सहयोगीहरूले २९९ संसदीय सिटमध्ये कम्तीमा १५२ सिट जितिसकेका छन् ।

देशको प्रमुख प्रतिपक्षी दल बीएनपी अर्थात् बंगलादेश नेसनलिस्ट पार्टी र उसका सहयोगीहरूले यो निर्वाचन बहिष्कार गरेका छन् । यस कारणले शेख हसिनाको पार्टी र सहयोगीहरूले बाँकी सिटहरू पनि जित्ने अपेक्षा गरिएको छ । बीएनपीले भोटिङमा धाँधली भएको आरोप लगाएको छ । आइतबारको नतिजा बीएनपीका नेता र उनीहरूका समर्थकहरूको सामूहिक गिरफ्तारीपछि आएको हो ।

निर्वाचनको नतिजा सोमबार औपचारिक रुपमा घोषणा हुने बताइएको छ । आधिकारिक तथ्याङ्कले मतदान निकै कम रहेको र करिब ४० प्रतिशत मात्रै मतदान भएको देखाएको छ । आलोचकहरूले त यी तथ्याङ्कहरू पनि बढाइचढाइ गरिएको बताउँछन् । स्वतन्त्र उम्मेदवारले ४५ सिट जितेका छन् । यी स्वतन्त्रहरू पनि अवामी लिगकै रहेको बताइएको छ । जबकि जातीय पार्टीले आठ सिट जितेको छ ।

पहिलोपटक सन् १९९६ देखि २००१ सम्म बंगलादेशको प्रधानमन्त्री भएकी शेख हसिनाको यो समग्रमा पाँचौं र लगातार चौथो कार्यकाल हो ।