इजरायलद्वारा गाजाको अस्पतालमा रकेट आक्रमण, पाँच सयको मृत्यु, मृत्यु हुनेमा धेरै महिला र बालबालिका
वि.सं.२०८० कात्तिक १ बुधवार १२:४६
अलजजिरा: गाजाको एक अस्पतालमा इजरायलले गरेको रकेट आक्रमणबाट पाँच सय जनाको मृत्यु भएको छ । गाजाको अस्पतालमा भएको रेकट आक्रमणका कारण प्यालेस्टाइनमा मृत्यु हुनेको संख्या बढेको छ ।
हालसम्म गाजा पट्टीमा कुल तीन हजार ५ सय मानिसको मृत्यु भएको छ भने १२ हजार घाइते भएका छन् । गाजाको स्वास्थ्य मन्त्रालयका अनुसार अल अहली ब्याप्टिस्ट अस्पतालमा कम्तीमा ५ सय जनाको ज्यान गएको बताएको छ । मृत्यु हुनेमा धेरै महिला र बालबालिका छन् । संयुक्त राष्ट्रसंघद्वारा सञ्चालित शरणार्थीहरूको आवासीय विद्यालयमा पनि आक्रमण भएको थियो ।
इजरायल र हमासबीचको जारी युद्धको १२औं दिन पुगेको छ । युद्ध वर्तमान युद्धले दिन प्रतिदिन नयाँ आकार लिइरहेको छ । आज युद्ध १२ औं दिनमा प्रवेश गरेको छ । यस युद्धका कारण दुवै देशले धेरै नोक्सानी बेहोरेका छन् । पछिल्लो जानकारी अनुसार युद्धमा हालसम्म एक हजार ४ सय इजरायलीको मृत्यु भएको छ भने ४ हजार ३ सय ९९ घाइते भएका छन् ।
यसैबीच, इजरायली सेनाले अल अहली ब्याप्टिस्ट अस्पतालमा भएको बम विष्फोटको पछाडि इस्लामिक जिहादको हात रहेको प्रमाणित गर्न भिडियो फुटेज जारी गर्ने दाबी गरेको छ । इजरायली प्रधानमन्त्री बेन्जामिन नेतन्याहुले गाजाको अस्पतालमा भएको हमला आइडीएफले नभई आतंकवादीहरूले गरेको हो भन्ने कुरा सारा विश्वले जान्नुपर्दछ भन्ने प्रतिक्रिया दिएका छन् ।
यसैबीच तनावका बीच अमेरिकी राष्ट्रपति जो बाइडेन इजरायल प्रस्थान गरेका छन् । उनले जोर्डनका राजालाई पनि भेट्ने जनाएका छन् ।
वि.सं.२०८० कात्तिक १ बुधवार १२:४६