अखबार नेपाल ट्रेन्डिङ

एजेन्सी: अमेरिकी प्रतिबन्धका बावजुत पनि इरानले आफ्नो तेल उत्पादन र निर्यात प्रक्रिया नरोकेको बताएको छ । अमेरिकी प्रतिबन्धका कारण इरानको पेट्रोलियम पदार्थ खरिदमा विभिन्न मुलुक डराएपछि इरानले आफ्नो उत्पादनलाई फरक तरिकाले बजारमा पठाइरहेको दावि गरेको छ ।

इरानका तेल मन्त्री बिजान नाम्दार जान्गानेहले एक स्थानिय पत्रिकालाई दिएको अन्तर्वातामा आफुहरुले अनाधिकारिक तथा फरक ढङ्गले तेलको विक्री वितरण गरिरहेको बताएका हुन् । उनले तेल निर्यात लगायतका सबैकुरा गोप्य राखिएको पनि बताएका छन् । तेल मन्त्री जानगानेहले इरानले कति मात्रामा तेलको निर्यात भइरहेको छ र कसलाई तेल बेचिरहेका छौं भन्नेबारे विवरण प्रतिबन्ध फुकुवापछि मात्रै सार्वजनिक गरिने बताएका छन् ।

इरानसँग विश्व शक्ति राष्ट्रहरूले गरेको आणविक सम्झौताबाट संयुक्त राज्य अमेरिका औपचारिक रूपमा फिर्ता भएको घोषणा गत बर्षको मे महिनामा भएको थियो । त्यसपछि वासिङ्टनले इरानलाई नयाँ सम्झौता गर्न दवाब दिन पहिलेका प्रतिबन्धमाथि थप कडाइ गर्दै नयाँ प्रतिबन्धको समेत घोषणा गरेको थियो । इरानी तेल मन्त्रीको यस्तो खुलासाका बारेमा अमेरिकाले भने अझै कुनै प्रतिक्रिया दिइसकेको छैन ।