अखबार नेपाल ट्रेन्डिङ

एजेन्सी: चीनले अमेरिकामा उत्पादन हुने केही सामानमाथि भन्सार कर थप गरेको छ । शनिबारबाट लागू हुनेगरी यस्तो कदम चालिएको चिनियाँ राज्य परिषद्को भन्सार कर समितिले जनाएको छ । चीनको पछिल्लो कदम अनुसार अमेरिकामा उत्पादन भएका करिब ६० अर्ब अमेरिकी डलर बराबरका आयातित सामानका सूचीमध्ये केही सामानका लागि बेग्लै भन्सार कर उठाइनेछ ।

यस्ता करको दर थप २५, २० र १० प्रतिशत रहेको चीनको सिन्ह्वा समाचार संस्थाले जनाएका छ । त्यसबाहेक यसअघि छ प्रतिशत बराबर भन्सार शुल्क लाग्दै आएका सामानमा छ प्रतिशत थपिएको जनाइएको छ ।

चीन–अमेरिका व्यापार विवादबारे अमेरिका र चीनबीच लामो समय छलफलपछि विश्व समुदायले विवाद अन्त्य गरी दुई ठूला अर्थतन्त्रले सम्झौता गर्ने अपेक्षा गरिएको थियो । चिनियाँ कानून र नियम बमोजिम, चीनले अविश्वसनीय एकाइ सूची खडा गर्ने छ । जसमा बजारको नियमको पालना नगर्ने, सम्झौता विपरीत काम गर्ने, व्यापारिक उद्देश्य बाहेकका अन्य लक्ष्य लिएकाहरूले चिनियाँ कम्पनीमाथि नाकाबन्दी र आपूर्ति विच्छेद गरेर चिनियाँ कम्पनीको आधिकारिक हक अधिकारमा गम्भीर क्षति पुर्याएका विदेशी व्यवसाय, संगठन वा व्यक्तिलाई नै समावेश गराइने चीनले बताएको छ ।