अखबार नेपाल ट्रेन्डिङ

एजेन्सीः अल्पसंख्यक विगुर मुसलमानमाथि उत्पीडन र ज्यादती गरेको आरोपमा चीनविरुद्ध अमेरिका र यूरोपेली देशहरूले नयाँ प्रतिबन्ध लगाएका छन् ।

विगुरहरू चीनको उत्तर–पश्चिमी क्षेत्र सिञ्जियाङमा बस्छन् । त्यहाँ चीनले यातनागृह नै बनाएर मुसलमानहरूलाई हिरासतमा राखेको आरोप लाग्ने गरेको छ ।

क्याम्पभित्र मानसिक यातना दिने, जबरजस्ती काम लगाउने र महिलाहरूमाथि यौन उत्पीडनसम्म गर्ने गरेको पश्चिमाहरूले दाबी गरेका छन् ।

चीनविरुद्ध पछिल्लो प्रतिबन्ध लगाउने देशहरूमा अमेरिका, क्यानडा, बेलायत र यूरोपेली संघका देशहरू रहेका छन् ।

चीनले भने विगुर मुसलमानमाथि कुनैपनि प्रकारको अत्याचार नगरेको र क्याम्प पुनर्शिक्षा केन्द्र मात्रै भएको बताउने गरेको छ ।

तर, बेलायती विदेशमन्त्री डोमिनिक राबले चीनको क्याम्पभित्र विगुर मुसलमानमाथि भएको उत्पीडन यो समयकै सबैभन्दा गम्भीर मानवअधिकार संकट भएको बताएका छन् ।

यूरोपेली संघले सन् १९८९ मा भएको तियानमेन चोक नरसंहारपछि चीनविरुद्ध मानवअधिकार उल्लंघनको आरोपमा प्रतिबन्ध लगाएको थिए ।

सन् १९८९ मा चीनका सैनिकले लोकतन्त्र समर्थन प्रदर्शनकारीहरूमाथि तियानमेन चोकमा गोलाबारी गरेका थिए ।

पछिल्लो प्रतिबन्धमा सिञ्जियाङ प्रान्तका वरिष्ठ अधिकारीहरूलाई पश्चिमाहरूले निशाना बनाएका छन् ।

उनीहरूमाथि विगुर मुसलमानको मानवअधिकार हनन गरेको आरोप लगाइएको छ ।

ती अधिकारीहरूमाथि यात्रा प्रतिबन्ध र विदेशमा रहेको उनीहरूको सम्पत्ति समेत जफत गर्नेसम्मको कारबाही हुनेछ ।

मानवअधिकार समूहहरूले चीनमा १० लाख भन्दा धेरै विगुर मुसलमानहरू हिरासतमा रहेको, चीन सरकारले जबरजस्ती विगुर महिलाहरूको परिवार नियोजन गराएको तथा बच्चालाई परिवारबाट अलग गरेको बताउने गरेका छन् ।

यसअघि बीबीसीले तयार गरेको खोजी रिपोर्टमा पनि विगुर महिलाहरूमाथि बलात्कार, उत्पीडन र योजनाबद्ध शोषण भएको तथ्य सार्वजनिक भएको थियो ।

बीबीसीमाथि चीनले प्रतिबन्ध लगाइसकेको छ ।

यी हुन् प्रतिबन्ध खेप्नेहरू

अमेरिकी र यूरोपेली देशको प्रतिबन्ध खेप्नेमा सिञ्जियाङ सार्वजनिक सुरक्षा ब्यूरोका निर्देशक चेन मिनग्वाओ पनि छन्। उनीमाथि मानवअधिकार उल्लंघनमा गम्भीर आरोप लागेको छ ।

वरिष्ठ चिनियाँ अधिकारी वाङ मिङसान र वाङ जुनझेङ तथा सिञ्जियाङकै कम्यूनिष्ट पार्टीका पूर्व उप–महासचिव झु हाइलुनमाथि पनि प्रतिबन्ध लगाइएको छ ।

सिञ्जियाङ प्रोडक्शन एन्ड कन्स्ट्रक्सन कर्प्स पब्लिक सिक्यूरिटी ब्यूरोमाथि पनि प्रतिबन्ध लागेको छ। त्यहाँ अर्का शीष अधिकारी जेन क्वानग्वाओले पनि प्रतिबन्ध खेपेका छन् ।

चीनको प्रतिक्रिया

नयाँ प्रतिबन्धलाई चिनियाँ अधिकारीहरूले झुठ र गलत सूचनामाथि आधारित कदम भएको बताएका छन् ।

अब यूरोपेली संघका १० व्यक्ति र चार संस्थामाथि आफूले पनि प्रतिबन्ध लगाउने चीनले चेतावनी दिएको छ ।

यी व्यक्ति र संस्थाहरू चीनको सम्प्रभुता र राष्ट्रिय हितविरुद्ध गलत प्रचारमा व्याप्त भएको चिनियाँ अधिकारीहरूले आरोप लगाएका छन् ।

यूरोपेली सांसद दलको नेतृत्व गरेका जर्मन नेता राइनहार्ड बूतीकाँफर चिनियाँ प्रतिबन्ध लाग्नसक्ने व्यक्तिहरूको सूचीमा छन् ।

अखिल नेपाल फुटबल संघको आयोजनामा थ्री नेसन्स कप अन्तर्राष्ट्रिय फुटबल प्रतियोगिता आजबाट सुरु
‘सी’ डिभिजन लिगमा आज प्लानिङ ब्वाइज र स्वयम्भु तथा विरगंज युथ र समाज कल्याणबीच प्रतिस्पर्धा