अखबार नेपाल ट्रेन्डिङ

एजेन्सी: अमेरिकाका विशेष काउन्सिल रोबर्ट मुलरको टोलीले सन् २०१६ मा भएको राष्ट्रपति चुनावमा राष्ट्रपति डोनल्ड ट्रम्पको चुनावी अभियानले रुससँग कुनै साँठगाँठ नगरेको निष्कर्ष निकालेको छ । मुलरको टोलीले २२ महिना लगाएर गरेको अनुसन्धानमा राष्ट्रपति ट्रम्पको चुनावी अभियानले रुससँग कुनै साँठगाँठ नगरेको निष्कर्ष निकालेको अन्तराष्ट्रिय सञ्चार माध्यमले जनाएका छन् ।

मुलरले तयार पारेको प्रतिवेदनको सार अमेरिकी संसद्समक्ष पुगेको जनाइएको छ । यसअघि मुलरले आफ्नो प्रतिवेदन अमेरिकी महान्यायाधिवक्ता विलियम बारलाई हस्तान्तरण गरेका थिए । महान्यायाधिवक्ता विलियमले त्यसको सार अमेरिकी संसद्समक्ष बुझाएका हुन् । संसद्मा बुझाइएको प्रतिवेदनमा राष्ट्रपति ट्रम्पले न्यायिक प्रक्रियामा अवैध तरिकाले बाधा पुर्‍याएको बारेमा भने केही उल्लेख गरिएको छैन ।

महान्यायाधिवक्ता विलियमले भने न्यायिक प्रक्रियामा हस्तक्षेप गरेको बारे पर्याप्त प्रमाण नभेटिएको जनाएका छन् । यो प्रतिवेदन सार्वजनिक भएपछि राष्ट्रपति ट्रम्प निकै उत्साहित भएको बताइएको छ । ट्रम्पले ट्वीट गर्दै कुनै मिलेमतो नभएको, कुनै बाधा नरहेको र आफू सम्पूर्ण आरोपबाट मुक्त भएको लेखेका छन् ।