अखबार नेपाल ट्रेन्डिङ

एजेन्सीः अमेरिकामा लकडाउन खुकुलो बनाएपछि कोरोना संक्रममितको संख्या झन बढेको छ । लकडाउन खुकुलो बनाएपछि अमेरिकाको मिसौरीमा एक हजामबाट ९१ जनामा कोरोना संक्रमण फैलिएको पुष्टि भएको छ । मिसौरीमा ४ मेबाट सैलुन खुलाइएको थियो । मिसौरीमा अहिलेसम्म ११ हजार ७ सय ५२ जनामा कोरोना संक्रमण पुष्टि भएको छ । तीमध्ये ६ सय ७६ जनाको मृत्यु भएको छ ।

वाशिंटनको स्पोकन शहरको एक पास्ता फ्याक्ट्रीमा २२ जना कर्मचारीमा कोरोना संक्रमण देखिएको छ । वाशिंटनमा हेयर सैलुन, जिम एक जुनदेखि खोल्न सकिने बताइएको छ । वाशिंटनमा अहिलेसम्म २० हजार ३ सय ९५ जनामा कोरोना संक्रमण पुष्टि भएको छ भने १ हजार ७६ जनाको मृत्यु भइसकेको छ । अमेरिकाका ५० राज्यमा अलग अलग समयमा लकडाउन खुल्ला गरिएको छ ।

अमेरिकामा राष्ट्रपति पदको चुनावका लागि डेमेक्रेटिक पार्टीबाट प्रवल दाबेदार जो बाइडेनले ट्रम्पको आलोचना गरेका छन् । बाइडेनले अमेरिकामा कोरोनाबाट करिव १ लाख मानिसको मृत्यु भइसक्दा राष्ट्रपति ट्रम्प भने गल्फ खेलिरहेको आरोप लगाएका छन् । अमेरिकामा अहिलेसम्म १६ लाख ६६ हजार ८ सय २९ जनामा कोरोना संक्रमण देखिएको छ भने ९८ हजार ६ सय ८३ जनाको मृत्यु भइसकेको छ ।