अखबार नेपाल ट्रेन्डिङ

काठमाडौं: विश्वव्यापी महामारीको रुप लिँदै गरेको कोरोना भाइरसको संक्रमणबाट एकै दिनमा झण्डै ५ हजार जनाको मृत्यु भएको छ । विश्वभर एकै दिन ७६ हजार नयाँ संक्रमित भेटिएका छन् । एजेन्सीहरुका अनुसार अमेरिकामा विगत २४ घण्टामा १ हजार भन्दा बढीको मृत्यु भएको छ भने त्यहाँ २६ हजार भन्दा बढी नयाँ संक्रमित भेटिएका छन् ।

यो सँगै अमेरिकामा मृत्यु हुनेको संख्या ५ हजार नाघेको छ भने संक्रमितको संख्या २ लाख १४ हजार पुगेको छ । त्यस्तै स्पेनमा एकैदिन ९ सय २३ जनाको मृत्यु भएको छ । त्यहाँ ८ हजार बढी नयाँ संक्रमित थपिएका छन् । स्पेनमा मृत्यु हुनेको संख्या ९ हजार ३ सय नाघको छ भने संक्रमितको संख्या १ लाख ४ हजार पुगेको छ । यस्तै इटलीमा ७ सय २७ जनाको मृत्यु भएसँगै त्यहाँ मृत्यु हुनेको संख्या १३ हजार पुगेको छ । इटलीमा संक्रमितको संख्या १ लाख १० हजार नाघेको छ ।

फ्रान्समा कोरोनाबाट एकै दिन ५ सयको मृत्यु भएको छ । बेलायतमा साढे ५ सय जनाको मृत्यु भएको छ । विश्वभर कोरोना भाइरसबाट संक्रमित हुनेको संख्या ९ लाख ३० हजार भन्दा बढी पुगेको छ । जसमध्ये झण्डै २ लाख मानिस उपचारपछि निको भएका छन् भने मृत्यु हुनेको संख्या झण्डै ४७ हजार नाघेको छ ।

यसैबीच कोरोना भाइरसको संक्रमणबाट दक्षिण अफ्रिकाकी एक एचआईभी वैज्ञानिकको मृत्यु भएको छ । एचआईभीको उपचार र औषधि पत्ता लगाउने कार्यमा लामो समयसम्म काम गरेकी वरिष्ठ वैज्ञानिक गीता रामजीको कोरोना भाइरसको संक्रमणका कारण मृत्यु भएको छ । ब्रिटिश एयरवेजले कोरोना भाइरसका कारण कम्पनीको अर्थव्यवस्था कमजोर भएपछि ३६ हजार कर्मचारी कटौतिको तयारी गरेको छ । अमेरिकामा मास्कको अभाव भएपछि घरबाहिर निस्किनुपर्ने मानिसले कपडाकै मास्क भए पनि लगाउनु पर्ने छलफल सुरु भएको छ ।