अखबार नेपाल ट्रेन्डिङ

काठमाडौं:  कोभिड १९ को महामारीबाट माथि उठ्दै गर्दा वैदेशिक रोजगारको क्षेत्र विस्तारै तङग्रिन थालेको छ । वैदेशिक रोजगारका लागि खाडीका केही देशहरुबाट माग आउन थालेपछि मेनपावर व्यवसायीबीच नै अस्वस्थ्य प्रतिष्पर्धा हुन थालेको हो ।

वैदेशिक रोजगारीको लागि कतारबाट आउने डिमाण्डलाई आफ्नो बनाउन मेनपावर व्यवसायीले अवैध चलखेल गरेर अस्वस्थ प्रतिष्पर्धा गर्दा त्यसको मार कामदारलाई पर्न थालेको छ ।

कतारका रोजगारदाता कम्पनीले सेवा शुल्क सहित श्रमिकको लागि सम्पूर्ण खर्च दिने भएता पनि नेपालका केही मेनपावरहरुले अहिले उल्टै कमिशन दिएर डिमाण्ड आफ्नो पक्षमा हत्याउन लागि परेका छन् ।

कतारका कम्पनीहरुले सेवा शुल्क मेनपावर कम्पनीलाई दिने गरेकोमा अहिले पाउँदै आएको उक्त सुविधा छोडेर आफ्नो पक्षमा पार्नका लागि प्रतिव्यक्ति ४ हजार रियालसम्म कमिशन दिने परेको पाइएको छ ।

कतारमा अस्वस्थ्य प्रतिष्पर्धामा नेपाल वैदेशिक रोजगार व्यवसायी संघका सल्लाहकार समेत रहेका शान नेपाल प्रालिका संचालक नवलकिशोर यादव अग्रस्थानमा रहेको पाइएको छ ।

कतारमा नै रहेका १३ वटा मेनपावरका प्रतिनिधिले संयुक्तरुपमा शान नेपालको विरुद्धमा दूतावासमा जानकारी गराउँदा कतारको बजारमा यादवले कमिशन बढाउन पछि नहटेको ति प्रतिनिधिले उल्लेख गरेका छन् । उनीहरुले भनेका छन्–‘ शान नेपाल प्रालिका संचालक नवल किशोरले कतारका प्रत्येक कम्पनीमा ३९ सयदेखि ४ हजार रियालसम्म अफर गर्ने गरेको पाइएको छ, यस विषयमा दूतावासमा पटकपटक ध्यानाकर्षण गराइसकेका छौ ।’

शानका संचालकले नेपाली दूतावासमा आफ्नो साँठगाँठ भएको बताउने गरेको कतारमा रहेका व्यवसायीहरुको भनाई छ । नेपाली दूतावास कतारले पनि शान नेपालको यस्तो गतिविधीलाई मुकदर्शक भएर हेरिरहेको छ ।

यता वैदेशिक रोजगार विभागले शान नेपालले ल्याएको मागपत्रलाई अनुसन्धान गर्नुपर्ने माग उठेको छ । शान नेपालका गतिविधीलाई निगरानीमा राख्नु पर्ने सर्वत्र आवाज उठेको हो ।

यद्यपी शानका संचालक यादवले आफुलाई बद्नाम गराउन केही मेनपावरहरुले अफवाह फैलाएको जिकीर गरेका छन् । तर, नेपालका मेनपावर व्यवसायीहरु पनि शान नेपालले चर्को कमिशनको अफर गरेको प्रमाण रहेको बताउँदै आएका छन् । ओमान, बहराइन लगायतका अन्य देशबाट न्यून संख्यामा डिमाण्ड आउने गर्दा कतार सबैको रोजाई बनेको छ ।