अखबार नेपाल ट्रेन्डिङ

काठमाडौं: नेपाल पर्यटन बोर्डले कोरोना भाईरस महामारीका कारण नराम्ररी थलिएको पर्यटन उद्योगलाई पुनर्जीवन दिन ‘टुरिज्म रिभाइभल टास्कफोर्स’ गठन गरी कार्य प्रारम्भ गर्ने बताएको छ ।

महामारीका कारण थलिएको पर्यटन उद्योगलाई पुनर्जीवन दिन समग्र पर्यटन क्षेत्रका संस्था तथा अगुवा व्यवसायिलाई एउटै छातामुनि ल्याएर पुनःरुत्थानको कामलाई प्रभावकारी बनाउने उद्देश्यले कार्यदल बनाइएको बोर्डले जनाएको छ ।

कार्यदलले वर्तमान अवस्थामा थलिएको पर्यटन उद्योगलाई पुनर्जीवन दिन अन्तरराष्ट्रिय अभ्यासको अध्ययन गरी आफ्ना सुझाव दिने र सोअनुसार सम्पूर्ण व्यवसायीलाई एकीकृत गरी सरकारलाई आगामी रणनीति निर्माण गर्न सहयोग पुर्‍याउने बताइएको छ ।

उक्त कार्यदलले तत्काल पर्यटनका गतिविधिलाई सुरक्षित ढङ्गले कसरी अगाडि बढाउन सकिन्छ भन्ने पनि अध्ययन गर्नुका साथै निरास हुँदै गएका व्यवसायी तथा मजदूरलाई के कस्तो आर्थिक कार्यक्रम ल्याउन सकिन्छ भन्ने मार्ग पहिल्याउन सहयोग गर्ने बताइएको छ ।