अखबार नेपाल ट्रेन्डिङ

काठमाडौं: नेपाली कामदारका लागि बन्द रहेको मलेसियाको रोजगारी आगामी आइतबारदेखि खुल्ने भएको छ । गत कात्तिक १२ गते मलेसिया र नेपालबीच भएको श्रम सम्झौताको मर्म अनुसार आगामी आइतबारदेखि अन्तिम श्रम स्वीकृति दिने कार्य शुचारु हुन लागेको हो ।

पहिलो चरणमा कलिङ भिसा लागेका ७ हजारभन्दा बढी कामदारलाई मलेसियाको अन्तिम श्रम स्वीकृति दिइने श्रम, रोजगार तथा सामाजिक सुरक्षा मन्त्रालयले जनाएको छ । गत जेठ महिनामा श्रम मन्त्री गोकर्ण विष्टले रोजगारका लागि मलेसिया जाने नेपाली कामदारमाथि स्वास्थ्य परीक्षण लगायतका नाममा आर्थिक भार लगाउने संस्थालाई खारेज गर्ने निर्णय गरेपछि मलेसियाको रोजगारी बन्द भएको थियो ।

मलेसियाको रोजगारी बन्द हुनु अगाडि ७ हजारभन्दा बढी कामदारको कलिङ भिसा लागिसकेको थियो । अब उनीहरुलाई प्राथमिकतामा राखेर अन्तिम श्रम स्वीकृति दिइने श्रम मन्त्रालयले जनाएको छ । नेपाली कामदार लिन मलेसियाले नयाँ स्वास्थ्य मापदण्ड पठाएको छ । जस अनुसार अब अन्तर्राष्ट्रिय मापदण्ड पुगेका स्वास्थ्य संस्थाले रोजगारीमा जान चाहने व्यक्तिको स्वास्थ्य परीक्षण गर्न सक्नेछन् ।