अखबार नेपाल ट्रेन्डिङ

काठमाडौं: राष्ट्रिय चिया तथा कफी विकास बोर्डले कफी खेती र नर्सरी स्थापना गर्न चाहनेलाई ५० प्रतिशत अनुदान दिने भएको छ ।

बोर्डले वार्षिक कार्यक्रमअनुसार चक्लाबन्दीमा कफी खेती विस्तार र कफी नर्सरी स्थापना कार्यक्रम कार्यान्वयनका लागि चक्लाबन्दी प्रोत्साहित गर्न अनुदान दिने भएको हो ।

अनुदान प्राप्त गर्नकालागि कम्तिमा ५० रोपनी जमीन चक्लाबन्दी गर्नुपर्ने र कफीको न्यूनतम ५० हजार बिरुवा उत्पादन गर्नेलाई ५० प्रतिशत अनुदान उपलब्ध गराउने बोर्डले जनाएको छ ।

बोर्डले इच्छुक कृषक समूह, फर्म, उद्योग, सहकारी र अन्य संघसंस्थालाई ३५ दिनभित्र प्रस्ताव पेश गर्न आह्वान गर्दै सोमबार सार्वजनिक सूचना जारी गरेको छ ।

इच्छुकले कफी क्षेत्र विस्तारका लागि न्यूनतम ५० रोपनी जग्गाको लालपुर्जाको फोटोकपी वा जग्गा धनीसँगको लिज सम्झौता र परियोजनास्थल रेखांकन गरिएको नापी विभागको नक्साको फोटोकपी पेश गर्नुपर्ने छ ।

बोर्डले चक्लाबन्दीमा कफी विस्तार कार्यक्रमका लागि प्रतिरोपनी ३० हजार रुपैयाँको दरले हुन आउने रकममा ५० प्रतिशत अनुदान दिने जानकारी दिएको छ ।

यो अनुदान रकमपछि जमीन चक्लाबन्दी गरेर कफी विस्तार गर्ने किसान तथा संघसंस्थाको लागत प्रतिरोपनी १५ हजार रुपैयाँमा मात्र पर्ने अपेक्षा बोर्डको छ।

कफी नर्सरी स्थापनाका लागि बढीमा ७ लाख ६९ हजार ८५० रुपैयाँमा ५० प्रतिशत अनुदान दिने बोर्डको सूचनामा उल्लेख छ । ‍