अखबार नेपाल ट्रेन्डिङ

काठमाडौं: नेपाल आयल निगमले खाना पकाउने ग्यासको सहज बिक्री वितरणका लागि नयाँ नियम ल्याएको छ । नेपाल सरकारले मंगलबार बिहानबाट देशभर लकडाउन लागू गरेपछि निगमले खाना पकाउने ग्यासको सहज बिक्री वितरणका लागि बुधबारबाट लागु हुने गरी नयाँ नियम ल्याएको हो ।

आयल निगमका अनुसार ग्यास उद्योगहरूले डिलरमार्फत ग्याँस बिक्री वितरण गर्ने कार्य अर्को सूचना नआएसम्म लागि बिक्रेतालाई पठाउने ग्यास सिलिन्डरको परिमाण, बिक्रेताको नाम, ठेगाना, प्यान वा भ्याट नम्बर लगायतका विवरण खुल्ने कागजात अनिवार्य गरेको छ ।

त्यस्तै, ग्यास उद्योगीहरुले आफूसँग भएको ग्याँसको शुरुको मौज्दात, भन्सारबाट आयात भएको परिमाण, उद्योगमा स्टाण्डवाई बसेको बुलेटको परिमाण गोदाममा भरिराखिएको सिलिण्डरको परिमाण र अघिल्ला दिन बिक्री वितरण गरिएको परिमाणसहितको क्लोजिङ स्टक देखिने विवरण आयल निगमलाई बुझाउनुपर्नेछ ।

मासिक रुपमा ‘एक परिवार एक सिलिन्डर’का आधारमा वितरण प्रणाली अपनाई उपत्यकाको लागि निगम केन्द्रीय कार्यालय, निगमको स्थानीय कार्यालय भएको जिल्लामा स्थानीय कार्यालय र निगमको कार्यालय नरहेको जिल्लामा, जिल्ला प्रशासन कार्यालयमा यस्तो जानकारी दिनुपर्नेछ ।

बिक्रेताले यसरी ग्यास बिक्री गरिएको उपभोक्ताको नाम, ठेगाना, नागरिकता नम्बर र फोन नम्बर प्रष्ट खुलेको रेकर्ड राख्नुपर्ने व्यवस्था समेत निगमले गरेको छ । उक्त रेकर्डका आधारमा जिल्ला प्रशासन वा निगमले अनुगमनको जुनसुकै बेला माग गर्न सक्नेछ ।