अखबार नेपाल ट्रेन्डिङ

काठमाडौं:  राष्ट्रपति विद्यादेवी भण्डारीले भारतीय सेनाध्यक्ष मनोज मुकुन्द नरवणेलाई नेपाली सेनाको मानार्थ महारथीको उपाधि प्रदान गरेकी छन् । बिहीबार राष्ट्रपति कार्यालयमा आयोजित एक समारोहमा नरवणेलाई मानार्थ महारथीको उपाधि प्रदान गरिएको हो ।

सन् १९५० मा पहिलोपटक स्वतन्त्र भारतका जनरल केएम करियप्पालाई नेपालमा मानार्थ महारथी पदवी प्रदान गरिएको थियो। ७० वर्षसम्म मानार्थ महारथीको दर्जा दिने परम्पराले निरन्तरता पाइरहेको छ।

नेपालका तर्फबाट मानार्थ महारथी प्राप्त गर्ने भारतीय स्थलसेनाध्यक्ष जनरल नरवणे १८ औँ सेनापति हुन्। गत जनवरीमा प्रधान सेनापति पूर्णचन्द्र थापालाई भारतीय राष्ट्रपति रामनाथ कोविन्दले भारतीय स्थल सेनाको महारथीको पदवी दिएका थिए।

नरवणेले भोलि पर्वतीय अवलोकनमा सगरमाथा क्षेत्रको उडानपछि रक्षा मन्त्रालय समेत सम्हालेका प्रधानमन्त्री केपी ओलीलाई शिष्टाचार भेट गर्नेछन् । उनी शुक्रबारै स्वदेश फर्किने कार्यक्रम रहेको छ ।