अखबार नेपाल ट्रेन्डिङ

काठमाडौं:  भरतपुर महानगरपालिकाले बागेश्वरीमा सञ्चालन गर्दै आएको आइसोलेशनमा रहेका सङ्क्रमितको पुनःगरिने पिसिआर परीक्षण निःशुल्क गर्ने भएको छ।

महानगरपालिकाले योगी नरहरिनाथ योग तथा प्राकृतिक चिकित्सालयसँग सहकार्य गरेर कोरोना सङ्क्रमण भएका महानगरवासीलाई महानगरले उपचार गर्दै आएको छ । आइसोलेशनमा रहेकाको खानपान, उपचार, आवास सबै व्यवस्था निःशुल्करुपमा गर्दै आएको छ।

सरकारले गरिब, असहाय, कोरोना नियन्त्रणमा अग्र मोर्चामा रहेर काम गर्नेबाहेकको पिसिआर परीक्षण गर्न छोडेको छ। अन्यले आफ्नै खर्चमा पिसिआर गर्नुपर्ने हुन्छ। आइसोलेशनमा बस्नेलाई आर्थिकरुपमा कुनै भार नहुने गरी परीक्षणसमेत निःशुल्क गर्ने महानगरपालिकाले जनाएको छ ।

बागेश्वरी आइसोलेशनमा हालसम्म ३०९ जना भर्ना भएका छन्। जसमध्ये २४२ जनाले कोरोना जितेर घर फर्किएका छन् भने ६६ जना उपचाररत छन्। त्यहाँका चिकित्सक, कर्मचारी, ठाउँको व्यवस्थापन, औषधि, दैनिक खानाको व्यवस्थालगायतका सबै खर्च महानगरले बेहोरेको छ।