अखबार नेपाल ट्रेन्डिङ

काठमाडौं: लहान स्थित ग्लोबल आइएमई बैंकका एक कर्मचारीमा कोरोना सङ्क्रमण पुष्टि भएसंगै बैंक सिल गरी कर्मचारीलाई क्वारेन्टिनमा राखिएको छ ।

ग्लोबल आइएमई बैंकमा कार्यरत महोत्तरी घर भएका ३४ वर्षीय कर्मचारीमा शनिबार साँझ कोरोना सङ्क्रमण पुष्टि भएको छ ।

उक्त कर्मचारीमा कोरोना सङ्क्रमण देखिएसंगै अहिले जनकपुरस्थित प्रादेशिक अस्पतालको आइसोलेसनमा भर्ना गरिएको लहान नगरपालिकाका स्वास्थ्य शाखा प्रमुख रामसुन्दर यादवले जानकारी दिए ।

बैंकका कर्मचारीमा कोरोना सङ्क्रमण पुष्टि भएसंगै उक्त बैंकलाई सिल गरी त्यहाँ कार्यरत कर्मचारीलाई एक होटलमा क्वारेन्टिमा राखिएको छ ।

सङ्क्रमित ती कर्मचारी केही दिनअघि लहानस्थित आन्तरिक राजश्व कार्यालयमा रहेको बैंकको काउन्टरमा बसेकाले आन्तरिक राजश्व कार्यालयका कर्मचारीलाई समेत क्वारेन्टिनमा राखिएको छ ।

बैंकका कर्मचारीमा सङ्क्रमण पुष्टि भएसँगै यहाँस्थित आन्तरिक राजश्व कार्यालयको सम्पूर्ण कार्य बन्द रहेको छ ।

कार्यालय प्रमुख कमलबहादुर राजलवटले सूचना प्रकाशन गरी यो विषम परिस्थितिमा कार्यालयका कर्मचारीको पिसिआर परीक्षण गर्नुपर्ने र त्यसको रिपोर्ट नआएसम्म कार्यालयको कामकाज बन्द गरिएको जानकारी दिएका छन् ।