अखबार नेपाल ट्रेन्डिङ

काठमाडौं: आज विश्व उपभोक्ता अधिकार दिवस नेपालमा पनि विभिन्न कार्यक्रम गरी मनाइँदैछ । हरेक वर्ष मार्च १५ तारिखमा विश्वभर उपभोक्ताको अधिकार सम्बन्धी विविध कार्यक्रम गरी मनाइने गरिएको छ । आजको दिन नेपालमा पनि उपभोक्ता अधिकारका क्षेत्रमा काम गर्ने विभिन्न सङ्घ संस्थाहरूले दिवसमा अवसरमा गोष्ठी, अन्तरक्रिया तथा चेतनामूलक कार्यक्रम गर्दैछन् ।

सन् १९६२ मार्च १५ मा अमेरिकी राष्ट्रपति जोन अफ केनेडीले सुरक्षा, सूचना, छनौट र सुनुवाईलाई उपभोक्ताका चार अधिकारमा रूपमा घोषणा गर्नुभएको सम्झनामा यो दिवस मनाइने गरिएको हो । सन् १९८५ मा संयुक्त राष्ट्र सङ्घको साधारणसभाबाट पनि केही बुँदा थपी अधिकारको अनुबन्ध पारित गरिएको थियो ।

उपभोक्तालाई गुणस्तरीय वस्तु तथा सेवा प्रदान गरिने भनेर संविधानमा उल्लेख भएतापनि यसको कार्यान्वयनको अवस्था भने दयनीय देखिन्छ । विश्व उपभोक्ता दिवस मनाईरहँदा नेपालमा भने उपभोक्ता सधैँ ठगीमा पर्ने गरेका छन् । उपभोग्य वस्तुमा हुने मिसावट र बजारमा हुने कालोबजारी महंगीले उपभोक्ता भने सधैँ मारमा पर्ने गरेका छन् । स्वच्छ उपभोग्य वस्तु तथा सेवा उपभोग गर्न पाउनु उपभोक्ताको अधिकार हो ।