अखबार नेपाल ट्रेन्डिङ

काठमाडौं: आज बिहानैदेखि काठमाडौं उपत्यकासहित देशका अधिकांश स्थानमा वर्षा भइरहेको छ । मौसम पूर्वानुमान महाशाखाका अनुसार पश्चिमका तराई भूभागबाहेक देशका बाँकी सबै स्थानमा गड्याङगुडुङसहित पानी परिरहेको जनाएको छ ।

काठमाडौं उपत्यकामा आज बिहान साढे ४ बजेदेखि नै हल्का वर्षा भइरहेको छ भने पश्चिमी र पूर्वी क्षेत्रमा शुक्रबार रातिदेखि नै पानी परिरहेको महाशाखाले जनाएको छ । अहिले वर्षा भइरहेको काठमाडौं उपत्यका लगायतका स्थानमा केही समयपछि पानी पर्न रोकिए पनि मध्याह्नपछि पुनः वर्षा हुने सम्भावना रहेको महाशाखाले जनाएको छ ।

यस्तै आज देशभरका उच्च पहाडी तथा हिमाली भेगमा हिमपातको पनि सम्भावना छ । मौमस पूर्वानुमान महाशाखाले शनिबार बिहान ६ बजे आगामी २४ घण्टाका लागि चेतावनी तथा परामर्श जारी गर्दै देशका केही स्थानहरूमा मेघ गर्जनचट्याङ हावाहुरी असिनासहित वर्षाको सम्भावना रहेको साथै उच्च पहाडी तथा हिमाली भूभागका केही स्थानहरूमा हल्कादेखि मध्यमसम्म हिमपातको सम्भावना रहेकाले सतर्कता अपनाउनु हुन अनुरोध छ ।

भोलि आइतबारबाट भने मौसम सुध्रिने सम्भावना छ । आकाशमा बादल देखिए पनि भोलि वर्षाको सम्भावना नरहेको मौसम पूर्वानुमान महाशाखाले जनाएको छ ।