अखबार नेपाल ट्रेन्डिङ

एजेन्सीः चीनले १० दिनमा कोरोना भाइरसका लागि छुट्टै अस्पताल तयार पारेको छ । चीनको वुहान शहरमा १० दिनमै अस्पताल तयार गरेको हो । अस्पताल तयार भइसकेकोले चीनले १४ सय मेडिकल स्टाफलाई उक्त अस्पतालमा पठाइसकेको छ । अस्पताल निर्माणमा चीनको सेनाले सहयोग गरेको थियो ।

१४ सय मध्ये ९ सय ५० जना साधारण तर्फका मेडिकल स्टाफ र चिनिया लिबरेसन आर्मीका ४ सय ५० जनालाई उक्त अस्पतालमा खटाइसकेको छ । गत जनवरी २३ बाट बनाउन शुरु गरिएको उक्त अस्पताल एक हजार बेड (शय्या) रहेको चिनिया सञ्चारमाध्यमले जनाएका छन् । १० दिनमा बनाएर उपचार शुरु गर्ने चीनको घोषणा अनुसार आजदेखि ‍औपचारिक रुपमा उपचार थाल्ने चीनको स्वास्थ्य मन्त्रालयले जनाएको छ ।

चीनले यस अघि सन् २००३ मा पनि बेइजिङमा यस्तै एक अस्पतालमा निर्माण गरेको थियो । चीनको ३१ राज्यमा फैलिएको कोरोना भाइरसका कारण अहिले सम्म चीनमा ३ सय ६१ जनाको ज्यान गएको छ भने १७ हजार २ सय ५ जना भाइरसका बिरामी रहेको जनाइएको छ । यसको असर चीन बाहिरका देशमा पनि फैलिएको छ । हिजो मात्रै फिलिपिन्समा उक्त भाइरसका कारण एक जनाको मृत्यु भएको छ । भाइरको संक्रमण नेपालसहित २२ देशमा संक्रमण फैलिएको छ ।

– योन्डोन तामाङ