अखबार नेपाल ट्रेन्डिङ

हेटौंडा : नेपाल कम्युनिस्ट पार्टी (नेकपा) ३ नम्बर प्रदेश संसदीय दलले प्रदेश ३ स्थायी राजधानी हेटौंडा र नाम बागमती राख्ने निर्णय गरेको छ । शुक्रबार केन्द्रीय सचिवालको निर्देशन अनुसारै राजधानी हेटौंडा र नाम बागमती राख्ने निर्णय गरेको मुख्यमन्त्री डोरमणि पौडेलले बताए ।

सबै माननीयले आफ्ना मत राखेपछि एउटै निष्कर्षमा पुगेको र प्रदेशको स्थायी राजधानी हेटौंडा र नाम बागमतीमा सबै नेकपाका सबै माननीय एकमत भएर निर्णय गरको मुख्य मन्त्री पौडेलले बताए । पुस २७ गतेभित्र मतदान प्रक्रियाबाट प्रदेशसभाबाट नाम र राजधानी टुङ्गो लाग्ने पनि पौडेलले बताए । उनका अनुसार नाम र राजधानीको प्रस्ताव शनिबार प्रदेशसभामा दर्ता हुनेछ ।

प्रदेशसभा ३ मा कुल एक सय १० सदस्यमध्ये नेकपाका ८० प्रदेशसभा सदस्य छन् । नेकपाभित्र प्रदेशको नाम भन्दा राजधानीको विषयमा विवाद छ । धेरै सांसद काभ्रेको पक्षमा रहेकाले संसदीय दलको बैठकमा सहमति जुट्न सकेको थिएन । प्रदेशसभामा नेकपा एक्लैको बहुमत छ ।