अखबार नेपाल ट्रेन्डिङ

काठमाडौं: सहिद स्मारक ‘ए’ डिभिजन लिगको पाचौँ चरणको अन्तिम खेल आज हुँदैछ । पहिलो खेलमा विभागीय क्लब एपीएफ र गत सिजनको उपविजेता संकटा क्लबबीच प्रतिष्पर्धा हुनेछ भने दोस्रो खेलमा आर्मीले तालिकाको पुछारमा रहेको सरस्वती क्लबसंग खेल्नेछ । खेल दशरथ रंगशालामा हुने छ ।

लिगमा दाबेदारीता प्रस्तुत गर्न एपीएफविरुद्ध संकटालाई जित्नै पर्ने दबाब छ । यस्तै, लिगको शीर्ष ६ भित्र अटाउने लक्ष्य बनाएको एपीएफलाई पनि जित्नै पर्ने दवाव छ । एपीएफ रेलिगेशन जोनकै नजिक रहेको छ । लिगमा ४ खेलबाट संकटा र एपीएफले जम्मा एक जित मात्रै दर्ता गराएका छन् । दुवै टिमको समान ४ अंक रहेको छ । लिग जित्ने लक्ष्य सहित होमिएको संकटा एक मात्रै जितले दबाबमा छ । उसले दुई खेलमा हार ब्यहोरेको छ भने एकमा बराबर गरेको छ । लिगमा एक मात्रै जित निकालेको संकटा ४ अंक सहित तालिकाको दशौं स्थानमा छ । यता, एपीएफ पनि संकटालाई पराजित गर्दै लिगमा लगातार दोस्रो जित निकाल्ने दाउमा छ ।

लिग जित्ने लक्ष्य बनाएको विभागीय टिम त्रिभुवन आर्मी क्लबलाई तालिकाको शीर्ष स्थान उक्लने अवसर छ । आज सरस्वती युथ क्लबलाई पराजित गरेमा आर्मीले लिग तालिकामा स्पष्ट एक अंकको अग्रता प्राप्त गर्नेछ । लिगमा दाबेदारीता प्रस्तुत गरेपनि पाचौं चरणसम्म आईपुग्दा आर्मीले शीर्ष स्थानमा उक्लिन पाएको छैन । मनाङ मर्स्याङ्दी र मछिन्द्रले अन्तिम खेलमा २–२ को बराबरी खेलेपछि आर्मीले लिगमा नेतृत्व गर्ने अवसर पाएको छ । सरस्वती भने रेलिगेशन जोनबाट बच्ने दाउमा छ । लिगमा ४ खेल खेलेको उसले कुनै अंक जोड्न सकेको छैन । सरस्वती तालिकको पुछारमा छ । रेलिगेशनबाट बच्न सरस्वतीलाई जितको आवश्यक छ । आर्मी पनि सरस्वती युथलाई पराजित गर्दै लिगको शीर्ष स्थानमा पुग्ने दाउमा छ ।