अखबार नेपाल ट्रेन्डिङ

काठमाडौं । जारी फिफा विश्वकप २०२६ को रोमाञ्चक र कडा प्रतिस्पर्धात्मक खेलमा जापान र स्वीडेनले १-१ गोलको बराबरी खेल्दै नकआउट चरणमा आफ्नो स्थान सुरक्षित गरेका छन् । यो बराबरीसँगै जापान समूह ‘एफ’ को उपविजेता बन्दै अन्तिम ३२ मा प्रवेश गरेको छ भने स्वीडेन उत्कृष्ट तेस्रो स्थान हासिल गर्दै आठ टोलिभित्र पर्दै अघिल्लो चरणमा पुग्न सफल भएको छ ।

डलास स्टेडियममा भएको यस खेलमा जापानलाई अघिल्लो चरण प्रवेशका लागि मात्र १ अंक (बराबरी) को आवश्यकता थियो । अर्कोतर्फ, ग्राहम पोटरको प्रशिक्षणमा रहेको स्वीडेनलाई भने दोस्रो स्थानमा उक्लिन स्पष्ट जितकै खाँचो थियो । खेलको सुरुदेखि नै जापानले नियन्त्रण जमाए पनि गोल गर्न भने सकेन ।

खेलामा जापानले दोस्रो हाफ सुरु भएको १० मिनेटमै अग्रता लियो । रित्सु दोआनको उत्कृष्ट थ्रु-बललाई सदुपयोग गर्दै दाइजेन माएडाले चलाखीपूर्ण तरिकाले बललाई जाली चुमाए । जापानको यो अग्रता लामो समय टिक्न सकेन । खेलको ६२औँ मिनेटमा स्वीडेनका एन्थनी एलाङ्गाले २० यार्ड टाढाबाट प्रहार गरेको शक्तिशाली सट गोलमा परिणत भएपछि खेल १-१ को बराबरीमा आयो ।

खेलको अन्तिम क्षणतिर स्वीडेनले आक्रामक खेल पस्किए पनि जापानका गोलकिपर जायन सुजुकीले अलेक्ज्याण्डर इसाक र एलाङ्गाका उत्कृष्ट प्रहारहरूलाई रोक्दै स्वीडेनलाई जितबाट बञ्चित गरे । समूहको अर्को खेलमा नेदरल्याण्ड्सले पहिले नै बाहिरिसकेको ट्युनिसियालाई पराजित गर्दै समूह ‘एफ’ को विजेता बनेको छ । उसले नकआउट चरणमा मोरक्कोसँग खेल्ने छ ।

यो नतिजासँगै अब उपविजेता जापानले अन्तिम ३२ को खेलमा बलियो प्रतिद्वन्द्वी एवं समूह सीको विजेता ब्राजिलको सामना गर्नेछ । स्वीडेनले भने अब समूह ‘बी’, ‘ई’ वा ‘आई’ मध्ये एकको विजेतासँग प्रतिस्पर्धा गर्नेछ ।