अखबार नेपाल ट्रेन्डिङ

काठमाडौं: प्रधानमन्त्रीका प्रमुख राजनीतिक सल्लाहकार असिम शाहको संयोजकत्वमा गठित ‘संविधान संशोधन बहसपत्र तयार गर्ने कार्यदल–२०८२’ को पहिलो बैठक आज बस्दैछ । मन्त्रिपरिषद्को चैत १६ गतेको निर्णयअनुसार गठित उक्त कार्यदलको बैठक दिउँसो ३ बजे प्रधानमन्त्री तथा मन्त्रिपरिषद्को कार्यालय, सिंहदरबारमा बस्न लागेको हो ।

संविधान संशोधनका सन्दर्भमा बहसपत्र तयार गर्न सरकारले विभिन्न राजनीतिक दलका प्रतिनिधि र कर्मचारीतन्त्रका विज्ञहरू समेटेर यो कार्यदल बनाएको हो । कार्यदलमा राष्ट्रिय स्वतन्त्र पार्टीका तर्फबाट मोहन आचार्य, नेकपा (एमाले) का तर्फबाट संविधानसभा सदस्य डा. भीष्मनाथ अधिकारी र नेकपातर्फबाट पूर्वकानुनमन्त्री देवप्रसाद गुरुङ सदस्य रहेका छन् ।

त्यस्तै, राष्ट्रिय प्रजातन्त्र पार्टीका तर्फबाट संसदीय दलका नेता ज्ञानेन्द्र शाही र राष्ट्रिय जनमोर्चाका महासचिव मनोज भट्ट पनि कार्यदलमा सदस्य छन् । नेपाली कांग्रेस, श्रम संस्कृति पार्टी, जनता समाजवादी पार्टी र लोकतान्त्रिक समाजवादी पार्टीले भने आफ्ना प्रतिनिधि पठाउन बाँकी छ । ती दलमा आन्तरिक छलफल भइरहेकाले सम्भवतः आजै सदस्यको नाम टुङ्गो लाग्ने बताइएको छ ।

कार्यदलमा सरकारी अधिकारीका तर्फबाट प्रधानमन्त्री तथा मन्त्रिपरिषद् कार्यालयका कानुन सचिव पुष्कर सापकोटा र नेपाल कानुन आयोगकी सचिव इन्दिरा दाहाल सदस्य छन् । कार्यदलको सदस्य सचिवमा प्रधानमन्त्री कार्यालयको कानुन तथा फैसला कार्यान्वयन महाशाखाका प्रमुख लिलाधर सुवेदीलाई तोकिएको छ । यो कार्यदलले संविधानमा परिमार्जन आवश्यक देखिएका विषयमा राजनीतिक र कानुनी पक्षबाट अध्ययन गरी बहसपत्र तयार गर्ने कार्यादेश पाएको छ ।