अखबार नेपाल ट्रेन्डिङ

काठमाडौं: चर्चित लोकदोहोरी तथा सेलो गायिका इन्दिरा गोले गुरुङको ५९ वर्षको उमेरमा निधन भएको छ । उनको गएराति १२ बजे ललितपुरको हत्तिवनस्थित आपार्टमेन्टमा निधन भएको पारिवारिक स्रोतले जनाएको छ । उनी क्यान्सर रोगबाट पीडित थिइन् ।

ललितपुरको कोन्ज्योसोम गाउँपालिका-५ भारदेउमा २०२३ साल कार्तिक ३ गते जन्मिएकी उनले ५ हजार भन्दा बढी गीतमा स्वर दिएकी छन् । उनले नेपाली लोक दोहोरी, तामाङ सेलो तथा भाषाका साथै देउडालगायत भाषा र भाकाका गीतहरु गाएकी छन् । २०४५ सालमा रेडियो नेपालबाट गीत रेकर्ड गर्ने अवसर पाएपछि उनी केही समय अघिसम्म गीत संगीत क्षेत्रमा व्यस्त थिइन् । उनको आजै बौद्ध परम्परा अनुसार अन्त्यष्टी गर्ने तयारी भएको छ । उनको प्रार्थिव शरीरलाई श्रद्धान्जलीका लागि राष्ट्रिय नाचघरमा राख्ने तयारी गरिएको छ । उनको दुई छोरी छन् ।