अखबार नेपाल ट्रेन्डिङ

काठमाडौं: २०६५ सालदेखि वर्षेनी मनाइँदै आएको गणतन्त्र दिवस भोलि जेठ १५ गते यस वर्ष सुरक्षा दृष्टिले उच्च सतर्कतायुक्त हुने भएको छ । भोलि नै सत्तारुढ नेकपा (एमाले) ले गणतन्त्र उत्सव र राप्रपा सहितका राजावादी समूहले ‘जनआन्दोलन’ कार्यक्रमको घोषणा गरेका कारण सुरक्षा रणनीति त्यही अनुसार बनाइएको छ ।

बिहानै टुँडिखेलस्थित सैनिक मञ्चमा आयोजना गरिने औपचारिक कार्यक्रममा राष्ट्रपति, उपराष्ट्र, प्रधानमन्त्रीसहित संवैधानिक अंगका प्रमुख एवं विशिष्ट सरकारी व्यक्तिको उपस्थितिलाई सहज बनाउन बिहानै सुरक्षाकर्मी खटिने छन् । उक्त कार्यक्रमको चटारो सकिनासाथ अर्कोखाले सुरक्षा तैनाथीमा नेपाल प्रहरी जुट्दैछ ।

त्यसअघि दिउँसो संयुक्त सदनको बैठकमा आर्थिक वर्ष २०८२/०८३ का लागि बजेट भाषण हुँदैछ । यी सबैखाले कार्यक्रमलाई लक्षित गर्दै प्रहरीले उपत्यकाभरका तीन हजार जनशक्तिलाई स्ट्याण्डबाई राखेको छ । जिल्ला सुरक्षा समितिले आज बेलुकीसम्म तयार पार्ने सुरक्षा योजनाबमोजिम कति र कस्तो जनशक्ति कहाँ तैनाथ गर्ने भन्ने कुराको टुंगो लाग्नेछ ।

तर, विशिष्ट व्यक्तिको आवतजावतलाई मध्यनजर गर्दै हालसम्म टुँडिखेलस्थित सैनिक मञ्चमा आयोजना गरिने गणतन्त्र दिवस समारोह र संसदमा बजेट भाषण प्रस्तुत गरिने नयाँ बानेश्वरस्थित संसद भवनको सुरक्षा व्यवस्थापनलाई प्राथमिकता दिइएको छ । हालसम्म ती दुई स्थानलाई प्रहरीले उच्च सतर्कतास्थल तय गरिएको छ ।

जिल्ला सुरक्षा समितिले हालसम्म एमालेको गणतन्त्र उत्सव मनाउनका निम्ति भृकुटीमण्डप क्षेत्रलाई अनुमति दिएको छ । तर, राप्रपाले गर्ने भनेको प्रदर्शनका लागि हालसम्म स्थान अनुमति दिइएको छैन । भोलिको प्रदर्शनका लागि काठमाडौं उपत्यकाका तीनै जिल्लाका सम्पूर्ण प्रहरी युनिट स्ट्याण्डबाई राखिएको छ । त्यसअन्तर्गत तीनवटै जिल्ला प्रहरी कार्यालय, चार किसिमका गण र विभिन्न गुल्मका प्रहरी रहेका छन् । ती सबै युनिटमा तीन हजार जनशक्ति रहेको छ ।