अखबार नेपाल ट्रेन्डिङ

काठमाडौं: चैत १५ गते समाजवादी मोर्चा र राजावादी दुर्गा प्रसाईं आमनेसामने हुने भएका छन् । गत २५ फागुनमा राजावादीहरूले राजधानीमा शक्ति प्रदर्शन गरेपछि समाजवादी मोर्चाले पनि गणतन्त्रको पक्षमा र सरकारले गरेका नराम्रा कामको भण्डाफोर गर्ने भएको हो ।

मोर्चामा नेकपा माओवादी केन्द्र, नेकपा एकीकृत समाजवादी, विप्लव नेतृत्वको नेकपा र नेपाल समाजवादी पार्टी (नेसपा) छन् । सत्ताको बागडोर सम्हालेका नेपाली कांग्रेस र नेकपा एमालेका अलोकतान्त्रिक क्रियाकलापले जनताका अधिकारहरू एकपछि अर्को गर्दै कुण्ठित भएको, जनतामा निराशा चिर्ने भनेर बनेको गठबन्धनले झन् निराशा निम्त्याएको आरोप मोर्चाले लगाएको छ ।

सरकार बिचौलिया दलालहरूको स्वार्थसिद्धिमा केन्द्रित भएको पनि मोर्चाको आरोप छ । साथै, सरकारले लोकतान्त्रिक मूल्य मान्यताको उपहास गरेको, अध्यादेशमार्फत सरकार चलाएको, सदन छलेको र संसदमा दर्ता भएका महत्त्वपूर्ण विधेयकहरू नियन्त्रण गरी राख्नेमा उद्यत भएको मोर्चाको आरोप छ । काठमाडौंमा हुने प्रदर्शनमा मोर्चासम्बद्ध सबै पार्टीका बागमती प्रदेशका सबै जिल्लाहरू, उपत्यकाका सबै जिल्ला र जनसम्पर्क कमिटी र जनवर्गीय संगठनले जनमास ल्याउने तयारी गरेको छ ।

मोर्चाको सभालाई चार दलका शीर्ष नेताहरूले सम्बोधन गर्ने तयारी समेत गरेको छ । सडकमा आन्दोलन सुरु गरेको मोर्चालाई सोमबार विद्युत् प्राधिकरणका कार्यकारी निर्देशक कुलमान घिसिङलाई हटाएपछि थप अर्को विषय थपिएको छ, जुन विषय अब संसददेखि सडकसम्म विपक्षीका लागि प्रमुख मुद्दा बनेको छ ।  नेपाल विद्युत् प्राधिकरणको कार्यकारी निर्देशक पदबाट कुलमान घिसिङलाई हटाउनुको कारणबारे प्रधानमन्त्रीको जवाफ माग गर्दै विपक्षी दलहरूले संसदका दुवै सदनको बैठक अवरोध गरेका छन् । आममानिसहरू पनि सरकारको कुलमान हटाएकोमा सडकमा प्रदर्शन गरिरहेका छन् । राजनीति दलहरू पनि सरकारको उक्त कदमको विरोधमा छन् ।

राजसंस्था पुनःस्थापनाको मागसहित स्वास्थ्य व्यवसायी दुर्गा प्रसाईंले पनि  यही चैत १५ गते जनप्रदर्शन गर्दै छन् । उनले लाखौँ मान्छे काठमाडौं आउन आतुर रहेको बताएका छन् । प्रसाईंले यो सरकारले नेपालीलाई सकुम्बासी बनाउँदै लगेको दाबी गरेका छन् । उनले भने, ‘सरकार भनेको गाँसबास दिने, शिक्षा, स्वास्थ्य, रोजगार दिने हो । यो सरकारले त नेपालीका घरबार लिलाम गरेर सुकुम्बासी बनाउँदै आएको छ । यो हाम्रो सरकार होइन । यो त मारबाडीको सरकार हो । त्यही भएर यो सरकारका विरुद्ध हाम्रो आन्दोलन हो ।’

उनको यो आन्दोलनलाई नवराज सुवेदीले साथ दिने भएका छन् । केही दिनपहिला सुवेदीको नेतृत्वमा राजसंस्था पुनःस्थापनाका लागि संयुक्त समिति बनेको छ । यो समितिले पनि दुर्गा प्रसाईंले नेतृत्व गरेको प्रदर्शनलाई सहयोग गर्ने भएको छ । चैत १५ गते समाजवादी मोर्चाको प्रदर्शनलाई काउन्टर दिन प्रसाईंले पनि प्रदर्शनको आयोजना गरेका छन् ।