अखबार नेपाल ट्रेन्डिङ

काठमाडौं: काभा वुमन्स नेसन्स लिग भलिबलको फाइनलमा आज नेपाल र भारत भिड्दै छन् । त्रिपुरेश्वरस्थित राष्ट्रिय खेलकुद परिषदको कभर्ड हलमा यी दुई टोलीबीचको खेल सवा ५ बजे हुनेछ ।

मङ्गलबार भएको सेमिफाईनल खेलमा नेपालले इरानलाई २५–२१, २८–२६ र २५–२० को सोझो सेटमा पराजित गरेर फाइनलमा भारतसँगको भेट पक्का गरेको हो । मङ्गलबार नै भएको सेमिफाईनलमा  भारतले श्रीलंकाविरुद्ध १५-२५, १६-२५ र २३-२५ को सोझो सेटको जित हात पार्दै फाईनल प्रवेश गरेको हो ।

लिग चरणमा इरानले नेपाललाई पाँच सेटमा हराएको थियो । नेपालकी कप्तान अरुणा शाहीले मङ्गलबारको लय कायम राख्दै फाइनलमा भारतलाई हराउने विश्वास व्यक्त गरिन् । कप्तान अरुणाले दर्शकका साथले पनि खेल जित्न सहयोग पुर्‍याएको र फाइनलमा पनि घरेलु दर्शकको यस्तै साथ रहने अपेक्षा गरिन् । नेपालका प्रशिक्षक जगदीश भट्टले खेलाडीको क्षमता र आत्मविश्वासले भारतलाई हराएर उपाधि जित्नेमा आफू ढुक्क रहेको बताए । नेपालले लिग चरणमा भारतलाई ३-२ को सेटमा पराजित गरेको थियो ।