अखबार नेपाल ट्रेन्डिङ

काठमाडौं: आइसिसी टि-२० विश्वकपको पहिलो अभ्यास खेलमा नेपाल क्यानाडासँग ६३ रनको फराकिलो अन्तरले पराजित भएको छ । क्यानाडाले दिएको १८४ रनको बलियो लक्ष्य पछ्याएको नेपाल १९.३ ओभरमा १२० रनमा समेटियो ।

नेपालको शीर्षक्रमका ब्याटरले केही राम्रो सुरुवात गरेपनि ठूलो स्कोर भने बनाउन सकेनन् । चौथो नम्बरमा ब्याटिङ गर्न क्रिजमा पुगेका कुशल मल्लले ३० बलमा २ चौका र २ छक्का प्रहार गर्दै सर्वाधिक ३७ रन जोडे । अनिल साहले १६ बलमा २४ रन बनाए । ओपनरद्वय आशिफ शेखले २२ र कुशल भुर्तेलले १० रन जोडे । अन्य कुनै ब्याटरले दोहोरो अंक जोड्न सकेनन् । सन्दिप जोराले ६ रन बनाउँदा करन केसी र सागर ढकालले समान ५ रन बनाए । सोमपाल कामीले ४ रन बनाए । कप्तान रोहित पौडेल १ रनमा आउट भए । गुलशन झा र अविनाश बोहोरा शून्यमा पेभेलियन फर्किए ।

क्यानाडाका लागि डिलन हेलिगर एक्लैले ४ विकेट लिए । जेरेमी गोर्डन र साद विन जफरले २-२ विकेट लिए । कलिम सना र पर्गत सिंहको नाममा १-१ विकेट रह्यो ।

नेपालले दोस्रो अभ्यास खेल अमेरिकासँग मे ३० मा खेल्नेछ । जुन १ बाट सुरु हुने विश्व कपमा नेपालले पहिलो खेल जुन ५ मा नेदरल्यान्ड्ससँग खेल्नेछ । जुन ११ मा श्रीलंका, जुन १४ मा दक्षिण अफ्रिका र जुन १६ मा बंगलादेशसँग खेल्नेछ ।